Oposicion no por distingui unda pa haci politikeria y unda pa ta un Arubiano!
Dia 31 di mei ultimo a cuminsa reunionnan entre e parlamentonan di e 3 paisnan caribense den Reino Hulandes. Riba e prome dia a tuma lugar e Tripartite, caminda cu tanto Corsou, Sint Maarten y Aruba a debati cu otro riba temanan importante cu ta regarda e posicion economico, social, financiero y educativo di cada pais den Reino Hulandes. Despues di esaki, for di 1 di juni te cu 5 juni, a tuma lugar e reunionnan di IPKO (Interparlementair Koninkrijksoverleg) na Den Haag Hulanda.
Na ocacion di e apertura di e IPKO mei – juni 2023 tanto e Presidente di Parlamento di Aruba sr. Edgard Vrolijk y Lider di Delegacion di Aruba a hiba nan discurso. Sr. Vrolijk a enfatisa riba e reunionnan fructifero y efectivo entre parlamentonan di e paisnan pa atende e asuntonan di reino na nivel di dicho plataforma. Asina Presidente di Parlamento sr. Vrolijk a enfoca riba e prome dia cu Aruba (y Corsou y Sint Maarten) ta hinca den un posicion di “camisa de once varas” cu lo mester tuma un ‘consensus’ rijkswet pa asina haya un porcentahe abou pa paga e 916 miyon florin di prestamo cu Aruba a ricibi pa por a sobrebibi di e pandemia di covid-19. Adicionalmente Vrolijk a reteira cu enbes di pusha un RAFT (Rijkswet Aruba Financieel Toezicht) riba Aruba y e otro paisnan, por regla esaki via di e LAFT cu ya caba Aruba ta implementando pa 5 aña.
Na su turno, e Lider di Delegacion di Aruba sra. Shailiny Tromp–Lee a duna un presentacion durante Tripartite y IPKO di e desaroyonan mas recien na Aruba. Y di e manera aki Sra. Tromp–Lee a elabora riba e tematicanan cu ta poni riba agenda cu ta entre otro trafico aereo entre e islanan, aspectonan climatico, esclabitud y colonialismo, geschillenregeling cu mester haya su atencion debido for di parti di Hulanda, y e situacion di e studiantenan caribense na Hulanda. E puntonan aki a keda debati tambe ampliamente den e reunionnan plenario den e sala di Tweede Kamer.
Pero lamentabel ta pa remarca cu ora Parlamento di Aruba participa na dicho reunnionan, esaki mester por refleha un delegacion di Aruba y no cada fraccion politico ni un parlamentario independiente cu ta participando na Tripartite y IPKO. Den e caso aki, miembronan di oposicion ta bay te Hulanda pa haci politikeria cu nan ta custumbra di haci na Aruba. Pa haci e situacion mas grave, nan ta compromete nan mes cu un medio di comunicacion y enbes di trece noticia cu contenido na pueblo, nan ta saca tur sorto di redo cu no tin nada di haber cu e trabounan di e delegacion di IPKO.
Pues, asina bo ta mira cu Aruba ta wordo representa pa 6 cara (Accion21, AVP, MAS, parlamentarionan independiente y un compania di media) den exterior na luga di un solo cara como pais Aruba. Hopi topico importante a bin dilanti durante e reunionnan di IPKO cu ta entre otro con pa mehora e situacion di nos studiantenan na Hulanda, e importancia di e ombudsman cu mester keda realisa mas pronto cu ta posibel y e ley riba siguridad di datonan.
Ta di lamenta pa wak con noticia unilateral ta sali di un media comprometi na oposicion (oposicion ta paga cu placa di pueblo) y asina duna pueblo noticia di un solo perspectiva. Esey no por, pasosbra asina nunca pueblo lo por forma su opinion na un forma obhetivo. Ora un delegacion di Aruba ta bay representa e pais den exterior, por ehempel den deporte, musica, cultura y principalmente si ta di Parlamento di Aruba, e delegacion mester sali papia na nomber di Aruba y no di nan partido!