ORANJESTAD – Prome Minister Evelyn Wever – Croes a organisa un Conferencia di Prensa den cual a trata e topico BBO na frontera. Prome Minister Wever – Croes a inicia e conferencia dunando un splicacion breve di locual cu a conduci na e situacion actual di introduccion di BBO na frontera.
Na 2017 ora cu Gabinete Wever – Croes I a cuminsa goberna, desde inicio a traha incansablemente pa mehora e situacion financiero di Aruba. Ya caba na 2019 por a mira cu a yega na un surplus chikito. E motibo principal pa cual a pone hopi enfasis riba mehoracion di e situacion financiero di Aruba tabata, pa motibo cu pronto lo mester a cuminsa paga e debe di 2000 miyon florin cu a wordo crea durante Gabinete Eman I y II. Sinembargo den preparacion pa cuminsa paga e debe aki, na 2020 e pandemia di COVID-19 a bati na nos porta cual a hinca Aruba den un debe adicional di 900 miyon florin. Na e momento ey e necesidad financiero a aumenta y tabatin mester di e placa pa scapa bida di hende, yuda Sector Comercial, Sector Priva, yuda esnan cu a perde trabou y mas. Aworaki cu e pandemia ta tras di lomba, mester bolbe prepara pa paga e 2000 miyon florin y e 900 miyon florin cu a bin acerca.
BTW of alternativa
Prome Minister Wever – Croes a sigui splica cu den preparacion pa paga e debenan aki, aña pasa na luna di augustus 2022 mester a tuma un decision. Na e ocasion tabatin un proposicion riba mesa cual tabata pa bin cu un BTW cu inicialmente lo tabata un porcentahe entre 6% y 18%, cual despues a cambia pa entre 6% y 14%. E preocupacion cu a wordo vocifera e tempo ey door di gremionan y comunidad tabata e efecto di inflacion cu introduccion di BTW por a bin cu ne, net na e momento ey cu tabatin e guera na Ukraina.
E calculacionnan cu a haci a indica cu e BTW cu lo por genera 70 miyon florin, cu ta necesario pa cuminsa paga e debenan, lo por a causa un inflacion di te cu 9.9%. Pues na e momento ey a busca un otro alternativa y a yega na e decision pa aumenta e BBO cu 1% cu tambe ta trece 70 miyon florin aden. Asina lo genera menos inflacion, esta 1.4% enbes di 9.9%.
BBO na frontera ta crea “level playing fiel” pa comerciantenan
Na e momento ey, gremionan sindical y gremionan comercial hunto, a presenta un rapport na Gobierno cu nan a yama: “Level Playing Field” dia 25 october 2022. Den e rapport aki, e recomendacion number 1 di e gremionan ta pa bin cu BBO na frontera, mirando cu esaki ta un belasting mas husto, e ta crea un level playing field / situacion mas husto, entre comerciantenan local y esnan cu ta importa. Ademas, den e rapport e gremionan a indica diferente motibo dicon mester bin cu e BBO na frontera, e docuemnto a wordo firma door di un combinacion di gremionan comercial y gremionan sindical. Entre otro: Aruba Food & Beverage Association (AFBA), Aruba Jewelers Association (AJA), Kamer van Kamer van Koophandel (KvK), Sindicato di Empleadonan Publico y Priva di Auba (SEPPA), San Nicolas Business Association (SNBA), Sindicato di Polis di Aruba (SPA), Vacation Rentals Professionals Aruba (VRPA) Vereneging van Werknemers met een Individuele Arbeidsovereenkomst bij WEB N.V. (VWI), Aruba Financial Center Association (AFCA), Aruba Hotel and Tourism Association (AHATA), Aruba Trade & Industry Association (ATIA), Comerciantenan Uni Aruba (CUA), Insurance Association of Aruba (IAA), Sindicato di Maestro di Aruba (SIMAR), Sindicato di Trahadornan den Telecomunicacion (STT) y Werkgevers Arubaanse Bouwnijverheid (WAB).
BBO na frontera tin inflacion mas abou
Prome Minister Wever – Croes a sigui splica cu unabes a haci calculacion di inflacion ta mira cu BBO na frontera lo a genera un inflacion di 0.7%, si compara henter e scenario por mira cu e BTW lo por a trece un inflacion di te cu 9.9% y e BBO di 1% tabata trece 1.4 % di inflacion. Pues a scoge pa esun di mas abou cu ta e BBO na frontera di 0.7%.
Pa conclui, Prome Minister a agrega cu, e timing na e momento aki ta yuda pasobra manera cu a mira den e rapport di IMF cu a wordo publica dialuna e siman aki, inflacion ta bahando na Aruba. Aña pasa nan a calcula cu pa e aña aki lo tin un inflacion di 5.5% pero aworaki nan ta cambia e pronostico y e ta yega te na 3.2%. Esaki lo duna alivio paso pa comunidad cual ta loke cu ta importante.