Home » Prome Minister Evelyn Wever-Croes: Durante e prome edicion di Periodista Pa Un Dia,  5 MUCHA DI SCOL BASICO A CONOCE DI CERCA E TRABOU VALIOSO DI TA UN PERIODISTA 

Prome Minister Evelyn Wever-Croes: Durante e prome edicion di Periodista Pa Un Dia,  5 MUCHA DI SCOL BASICO A CONOCE DI CERCA E TRABOU VALIOSO DI TA UN PERIODISTA 

by Admin
0 comment 74 views

 

 

Pa motibo di e interes y demanda pa cu Periodista Pa Un Dia, inscripcion a cera

 

ORANJESTAD –  Diabierna ultimo, a tuma luga e prome edicion di Periodista Pa Un Dia den e di dos edicion di Conferencia Hubenil. Periodista Pa Un Dia ta un proyecto cu a cuminsa na 2021, y mirando e exito y interes di e muchanan pa cu e proyecto aki, Gobierno a dicidi di continua esaki e aña aki tambe. 

 

Prome Minister Evelyn Wever-Croes a splica cu e meta di e proyecto aki, ta pa nos muchanan, cu ta nos futuro generacion, siña conoce mas di cerca e carera importante di periodismo. Ta hopi importante pa un pais tin bon periodistanan ya cu ta nan ta mantene comunidad informa di tur acontecimento. P’esey ta sumamente importante pa cuminsa inculca den e muchanan e importancia di e carera aki. 

 

E proyecto aki ta organisa pa Ministerio di Asuntonan General, y mirando cu Dia di Prensa ta na caminda, a scoge pa haci esaki den e luna di juni na unda cu tur diabierna, 5 mucha di scol basico ta invita na Bestuurskantoor pa bin haci nan preguntanan na Prome Minister. Na yegada e muchanan ta wordo prepara pa un periodista y e team di PR di Gobierno. Diabierna ultimo a toca turno na e periodista conoci Andrew Vrolijk di TeleAruba pa prepara e muchanan na nan yegada. 

 

Prome Minister a indica cu durante e sesion di pregunta a resalta cu e muchanan tin hopi interes den gobernacion. E muchanan a bin bon prepara y nan preguntanan tabata hopi interesante. “Sigur un atardi hopi ameno na unda e muchanan a siña hopi di loke ta e trabou valioso di ta un periodista,  y lo mas importante ta cu nan a bay super contento,” Prome Minister a expresa. 

 

Prome Minister ta gradici tur e muchanan cu a participa den e prome edicion di Periodista Pa Un Dia, na e mayornan pa tuma e tempo pa trece nan yiu bestuurskantoor, y e scolnan cu ta encurasha e muchanan pa registra y participa na proyectonan importante asina. 

 

Prome Minister ta gradici tur mayor cu a permiti nan yiunan participa. Pa motibo di e interes y demanda pa cu Periodista Pa Un Dia, inscripcion a cera. Muchanan cu no ta participa, por wak Periodista Pa Un Dia via TeleAruba y riba pagina di Facebook di Gabinete Wever-Croes.

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio