ORANJESTAD: Diamars mainta, Minister Endy Croes conhuntamente cu coleganan Minister President Evelyn Wever-Croes, Minister Rocco Tjon, Parlamentario Sra. Darlaine Guedez-Erasmus, y ekipo di profesionalnan di e veld social a haci un bishita na e edificio nobo di Stichting Hunto na Dakota pa haya un bista di e trabou y avansenan. Manera ta conoci na luna di augustus di 2022, a pone e prome piedra pa e construccion. Den e edificio lo ubica Fundacion pa Maneho di Adiccion di Aruba (FMAA) y Sociaal Psychiatrische Dienst (SPD), pa asina alinia e procesonan mucho mas miho y eleva e calidad di cuido cu ta brinda na comunidad di Aruba den cuadro di salud mental y adiccion. Ambos organisacion a mira e necesidad pa haci e cuido cu cada un ta brinda mas accesibel y alabes enfoca riba e clientenan cu tin un “dubbele diagnostiek” cu atencion specifico pa mucha-, hoben- y adultonan. E vision ta pa percura cu e clientenan por rehabilita y reintegra den comunidad.
Minister Endy Croes a expresa di ta hopi contento di por a mira e avancenan y cu dentro di dos pa tres luna e edificio ta completamente cla y operacional. E edificio di Stichting Hunto ta situa memey di tres scol, caminda por duna asistencia desde mucha caba. Pa e vision aki, Minister Endy Croes ta felicita e Raad van Bestuur, directornan y tur esnan cu a bini hunto pa haci e proyecto aki un realidad. Palabra di felicitacion pa tur esnan den e veld cu ta traha incansablemente pa brinda ayudo na tur e personanan den comunidad cu tin un of otro problema di salud mental. Minister Endy Croes ta felicita colega Minister Rocco Tjon y ekipo cu ta trahando duro pa bin cu solucion pa problema di salud mental y adiccion na Aruba. Esaki sigur ta un bunita proyecto di Gabinete Wever – Croes II.