Oranjestad, Mei 30 2023 – Un publico diverso, interesa y cu hopi conocemento a participa na e consulta pa traha un ruta interpretativo den Ayo.
E ‘Junior counterpart’ di e proyecto Stacey-Ann Trapenberg tabata encarga pa splica bishitantenan tocante e proceso pa yega na un plan interpretativo pa Ayo y a hasi nan varios pregunta pa documenta nan idea – y deseonan. E contribucion di Stacey-Ann Trapenberg na e proyecto aki ta pa sigura e perspectiva di e generacion nobo den e plan y ta danki na e ‘Milton Harms Fonds op Naam di Prins Bernhard Fonds Caribisch Gebied’.
Tur esnan cu a yega Ayo e mainta a haya un guia di arkeologo di Museo Arqueologico Nacional Aruba, Harold Kelly y di Francisco Croes, antiguo registrador di e museo. Despues di e caminata bishitantenan a disfruta di un sabroso awa di lamoenchi prepara pa Margriet Lee.
Den e lunanan nos dilanti lo sigui traha riba e plan y sigur lo invita publico un biaha mas pa tende nan reaccion riba e concepto pa e plan, asina cu tin esaki. E compania encarga cu desaroya e plan, Camia y Aruba Amenities Committee ta gradici tur esnan cu a participa y contribui cu e consulta aki.
