Partido di Pueblo Arubano ta sigui monitor di cerca e desaroyonan rond di e situacion entre Gabinete Wever-Croes II y fundacion SABA. A pesar cu ta pendiente di e resultado di caso den corte, parlamentario drs. Arthur Dowers a sintie obliga di bin dilanti y reacciona despues di a keda babuca pa declaracionnan recientemente haci door di Minister di Salud Publico, Dangui Oduber y su colega di Asunto di Grandi, Ursell Arends. E parlamentario di AVP ta sinti cu ambos mandatario ta hunga ping pong cu e salud y bida di nos grandinan.
Loke a remarca anteriormente door di AVP, a keda confirma y esey ta Minister Arends no ta compronde kico e ta haciendo, ni tampoco tin e curason pa carga e cuido cu mester duna na nos grandinan. Sin cuer’i cara Arends a bin dilanti y bisa cu aworaki e momento a yega pa elimina e verpleeghuiszorg na Aruba.
Dowers: “Ta hopi tristo pa mira cu nos pueblo a yega na un situacion caminda ta wega di ping pong tin cu salud y bida di hende. Un ta bisa cu e no kier bo y e otro ta cera cranchi y bay muri numa.” Nos a yega asina leu cu nos tin hende sinta den posicion di gobernante, cu a boga pa e responsabilidad bisando cu nan tin e solucion y nan sa con pa goberna y ora cu e momento yega, ta core pa nan responsabilidad pa loke ta trata cuido di esunnan di mas malo y den mas necesidad.
E parlamentario ta spera cu mas hende lo sali y denuncia loke ta pasando, specialmente e profesionalnan. “No ta dunando balor na e bida di ser humano. E partido pa trece cambio, pero cu mas bien a bira e RAIZ di MEP, a djis trece mas dolor pa pueblo,” Dowers a expresa diamars mainta. E ta pidi e ciudadano pa ta consciente di e grupitonan aki cu ta lanta y bisa cu nan tin solucion. “E solucion cu nan tin ta pa nan mes y pa yuda MEP keda na poder. Nan ta partido satellite di MEP.”
Tin comprension pa echo cu e materia di salud publico no ta facil. Ningun hende a spera cu Arends lo a lanta y core di biaha, pero si a spera por lo menos pa e scucha for di esunnan cu si sa, cu e lo a lesa y profundisa su mes den e materia. “Si no, ta pakico anto a introduci e cartera di asunto di hende grandi, si no ta bay defende nan interes y bienestar? A resulta cu Minister Arends no por atende ni sikiera cu un pretpakket”.
Dowers a finalisa bisando cu e situacion aki ta crea door di un grupo cu tin hopi ambicion, pero poco conocemento y determinacion pa dedica na e retonan cu nos pais ta confronta.