ORANJESTAD – Prome Minister Evelyn Wever – Croes ta duna un resumen di e prome Caribbean Climate and Energy Conference (CCEC) cu a wordo organisa na Aruba dianan 10 te cu 12 mei. Durante di e conferencia paisnan rond mundo a dialoga riba temanan importante, peocupacionnan existente y con por traha hunto pa yega na solucionnan necesario na bienestar di sociedad.
Riba e prome dia di CCEC e enfoke tabata riba temanan di Reino. Tur e paisnan den Reino a intercambia di idea y di vision, y yega na algun palabracion concreto pa sigui traha hunto. Un di e palabracionnan cu a haci ta cu ta bay organisa reunionnan ‘vierlandenoverleg’ entre Hulanda, Aruba, Corsou y Sint Maarten, pa sigui trata e tema di energia y clima.
Prome Minister Wever – Croes a splica cu den cuadro di esaki Hulanda ta dispuesto pa brinda sosten y a anuncia fondonan disponibel pa esaki. A papia di diferente fondo, y un di nan ta 100 miyon euro cu ta wordo poni disponibel pa Aruba, Corsou y Sint Maarten, pa realisa proyectonan cu tin di haber cu avansenan ncecesario den cuadro di clima y energia.
Riba e di dos dia a trata diferente tema y un di esakinan ta, con lo financia e transision di energia. Tur pais lo kier transisiona pa energia mas limpi, mas confiabel y mas sostenibel, pero e mester por ta pagabel pa e ciudadano. Pesey diferente organisacion financiero tambe tabata presente na Aruba entre otro, representantenan di Caribbean Development Bank, International Development Bank, IMF pa mira con por sostene paisnan den e financiamento aki di proyectonan.
E tercer dia, a ‘showcase’ tur proyectonan andando y locual cu Aruba ta haciendo den cuadro di transision di energia pa uno mas limpi, barata y mas sostenibel. Tabatin presentacion di e parke di molina di biento nobo cu ta bay bin. Tambe tabatin presentacion di Eagle LNG cual a mustra con aki aki 30 luna, Aruba no lo haci uzo mas di Heavy Fuel Oil (HFO) cual ta algo hopi sushi y cu ta daña medio ambiente, sin conta cu awo e ta mas caro y e prijs ta fluctua hopi. Pues unabes cu transisiona pa LNG, e lo trece stabilidad den e prijsnan y lo tin energia mas limpi, Prome Minister Wever – Croes a splica. Tambe a haya presentacion di Hydrogen Valley cual ta un gran soño di Aruba.
Di e forma aki paisnan presente di Caribe, Latino America, Europa y di Pacifico, a haya un bista di tur locual cu Aruba ta bezig cu ne.
Minister di Clima y Energia di Hulanda Rob Jetten
Na final di e conferencia Minister Jetten a expresa cu e ta sumamente contendo cu con e conferencia a bay y cu e 6 islanan den Reino Hulandes a haya oportunidad pa tene hopi bon combersacion cu otro tocante un acercamento conhunto contra cambio di clima. Ademas, e diferente dialogonan cu e paisnan internacional tambe tabata exitoso. Por a experiencia con paisnan den region caribense den un forma intensivo a bini hunto pa comparti experiencianan y pa mira con por haci henter e region mas resiliente contra cambio di clima.
Finalmente, Prome Minsiter Wever – Croes a gradici y alabes felicita Ministernan di Energia Glenbert Croes y tambe Minister di Naturalesa y Medio Ambiente Ursell Arends cu a yuda haci e conferencia posibel. Sin lubida Minister di Clima di Hulanda Rob Jetten cu a demostra di ta kere den e vision y cu ta dispuesto pa yuda Aruba.
