Abeha y otro polinador manera barbulet, raton di anochi, blenchi y hopi otro especie di animal y insecto ta ser menaza pa actividadnan di ser humano. Polinacion ta un proceso fundamental den e sobrevivencia di ecosistemanan. Casi 90% di tur planta cu ta florea ta depende completamente of grandemente riba polinacion animal, y mas cu 75% di e cultivonan agricola y 35% di e areanan di agricultura global.
Abehanan ta bou menaza. E taza di extincion pa especienan ta 100 pa 1000 biaha mas halto cu normal y ta causa pa impactonan humano.
Cerca di 35% di polinadornan invertebrado, particularmente abeha y barbulet, y como 17% di polinador vertebrado manera raton di anochi, ta enfrentando extincion mundialmente.
Si e tendencia aki continua, cultivo nutritivo manera fruta, nuez, y hopi verdura lo (mester) ser substitui pa cultivo basico manera, batata, aros y maishi resultando den un dieta hopi inbalanza.
Nacionan Uni a designa 20 mei como Dia Mundial di Abeha mediante resolucion A/RES/72/211 na 2017.
Mediante celebracion di Dia Mundial di Abeha cada aña nos ta eleva e concientisacion pa e papel cu abeha y otro polinadornan ta hunga den mantene ser humano y nos planeta Tera saludabel, y alabes riba e cantidad di reto cu e abehanan ta encontra y enfrenta awendia, hopi di nan na man di ser humano mes.
E TEMA PA 2023: BEE ENGAGED IN POLLINATOR-FRIENDLY AGRICULTURAL PRODUCTION
E tema pa 2023 ta “Compromiso cu abeha- promoviendo un produccion agricola protehando polinador”.
Abeha y otro polinador ta fundamental pa e salud di ecosistema y seguridad alimentario. Nan ta mantene biodiversidad y ta asegura e produccion di alimento nutritivo.
Sinembargo, practicanan di agricultura intensivo, cambio di uso di tereno, monocultura, pesticida y temperaturanan mas halto a consecuencia di cambio climatico tur ta presenta problema pa abeha y consecuentemente e calidad di cultivonan produci den agricultura.
Produccion intensivo di monocultura y uso impropio di pesticida ta un menaza serio pa polinador ya cu nan ta reduci acceso na cuminda y lugar pa reproduci, exponiendo nan na chimico peligroso y cu ta afecta nan sistema imunologico
E tema pa Dia Mundial di Abeha 2023, “Compromiso cu abeha- promoviendo un produccion agricola protehando polinador ta haci un yamada global pa promove tur practica agricola cu ta tene cuenta cu polinador y ta destaca e importancia pa proteha abeha y otro polinador, particularmente mediante practicanan di produccion agricola basa riba evidencia.
DIA MUNDIAL DI ABEHA 2023: E SITUACION NA ARUBA
Den e presentacion titula “A closer look at Aruba’s agricultural soil quality and the relationships between local farmers and Santa Rosa” na Universidad di Aruba den e simposio di e estudionan haci den cuadro di e programa UA-UCU entre Universidad di Aruba y University College Utrecht a sali na cla cu agricultornan na Aruba ta usa relativamenta poco pesticida y mas tanto ta usa practica di agricultura organico.
Pero na Aruba e uso di pesticida, fungicida, herbicida y miticida (ES: acaricida, pa mata pispis) ta un practica comun tanto den uso residencial como comercial den hardin y landscaping.
Greenpeace USA y Greenpeace International den nan campaña internacional “Save the Bees” a produci varios rapport y a conduci investigacion riba pesticida.
Biologonan a encontra mas di 150 diferente residuo chimico den polen di abeha, un cocktail fatal segun e investigador y apicultor Eric Mussen di University of California.
Pero companianan manera Bayer, Syngenta, BASF, Dow, DuPont y Monsanto no kier cambia nan maneho den produccion di pesticida, por cierto un negoshi super lucrativo.
E European Food Safety Authority (EFSA) a produci un rapport cientifico identificando tres pesticida cu un uso hopi amplio, esta e compuestonan neonicotinoida conoci como clotianidina, imidacloprid y tiametoxam cu ta presenta riesgo severo pa abeha.
Un rapport cientifico produci pa Greenpeace, titula “Bees in Decline” ademas di e tres compuesto ta identifica cuater pesticida mas peligroso pa abeha, esta clorpirifos, cipermetrina, deltametrina y fipronil.
Na Merca e uso di neonicotinoida ta ser indica pa US Department of Agriculture como peligroso ya cu por causa colapso di colonia di abeha, pero Environmental Protection Agency ta sigui permiti nan uso y na 2014 Barack Obama a firma e infame “Monsanto Protection Act” cu ta otorga compania biochimico imunidad contra casonan den corte pa daño causa na ser humano y e medio ambiente.
E Pesticide Action Network Europe (PAN Europe) ta aplaudi e reciente “EU Guidance Document on the risk assessment of pesticides on bees”, indicando cu por fin Union Europeo ta implementando un maneho mas efectivo pa proteha abeha contra uso di pesticida peligroso.
Kico tur esaki ta nifica pa Aruba?
E uso di pesticida na Aruba ta poco regula, y ademas tin algun otro chimico cu tambe ta peligroso pa abeha siendo glifosato (glyphosate, conoci como e herbicida Roundup). E producto malathion usa pa combati sangura ta altamente toxico pa abeha. Y e pesticidanan deriva di e flor crisantemo manera piretrina y piretrinoida por ta peligroso pa ser humano y definitavemente ta peligroso pa abeha.
Pa nos proteha nos abehanan y otro polinador mester bin un maneho mihor pa uso y prohibicion di pesticida, herbicida, fungicida y acaricida den agricultura, uso residencial y comercial.
Con nos mes por contribui pa haci algo riba proteccion di abeha y apicultura?
Individualmente dor di:
- planta un variedad di mata nativo, cu ta florea durante diferente periodo di aña;
- cumpra honing fresco di agricultor local;
- cumpra productonan cu ta origina for di practicanan di agricultura sostenibel;
- evita uso di pesticida, fungicida y herbicida den nos cura y jardin;
- proteha colonia di abeha salvahe na unda e ta posibel;
- sponsor un cas di abeha cerca un agricultor of apicultor;
- crea fuente of wowo di awa pa abeha pafor;
- yuda sostene ecosistema silvestre y di campo;
- eleva concientisacion dor di comparti e informacion aki den nos comunidad y nos rednan social, ya cu e reduccion di e abundancia di abeha ta afecta nos tur!
Como agricultor of apicultor, dor di:
- reduci, of cambia e uso di pesticida;
- planta mas tanto diferente cultivo, y/of planta mata cu ta atrae abeha rond di e area di planta;
- crea trankera.
Como gobiernonan y tumadornan di decision dor di:
- fortalece e participacion di comunidadnan local den tomo di decision, en particular di pueblonan indigena cu conoce y respeta ecosistemanan y biodiversidad;
- enforza medidanan strategico, incluyendo incentivonan financiero pa yuda haci cambio;
- aumenta colaboracion entre organisacionan nacional y internacional, organisacionan y rednan academico y di investigacion cientifico pa monitorea y evalua servicionan di polinacion.