“Mi a sali di e conferencia aki cu hopi animo, y hopi material pa asina por sigui traha duro riba cambio di nos sistema di uza energia”
ORANJESTAD – Durante e siman di 10-12 di Mei 2023, Aruba tabata isla anfitrion pa loke ta e prome “Caribbean Climate Energy Conference 2023 (CCEC2023)”. Un siman fructifero na unda a toca temanan importante pa loke ta e maneho di e Transicion Energetico, Adaptacion di Clima y e Financiamento pa cu e proyectonan aki. E conferencia aki a conta cu participacion di representantenan di diferente pais rond mundo na unda a yega na palabracionnan concreto.
Despues di e conferencia, a logra entrevista señora Ruthmilda Larmonie-Cecilia cu ta Minister di Desaroyo Social, Labor y Bienestar di Corsou y alabes e Vice Prome Minister. Señora Larmonie-Cecilia a indica cu e 3 dianan di e conferencia tabata sumamente importante pa e islanan chikito cu poco poco ta sintiendo e efectonan di cambio di clima. Segun e mandatario, e por a saca afor cu unabes e paisnan den Reino uni forsa, nan lo logra cosnan grandi den beneficio di e comunidad. Tambe el a indica cu e situacion di clima ta yegando mas cerca di e paisnan chikito y p’esey a bira ora pa atende cu esaki na un forma structural.
“E 3 dianan aki tabata uno importante y fructifero na unda e paisnan chikito a conecta lasonan cu otro pa asina sigui traha den bienestar di nos pueblo. Tambe ta importante pa traha hunto pa asina den futuro como islanan den Caribe nos por sostene otro ora cu tin necesidad. Mi a sali di e conferencia aki cu hopi animo, y hopi material pa asina por sigui traha duro riba cambio di nos sistema di uza energia”, e mandatario a expresa.
