Home » Un seminario cu ta promete di ta uno unico cu informacion valioso tocante salud mental ‘MENTAL HEALTH IN BUSINESS: BODY-MIND-SOUL’ TA E DI OCHO SEMINARIO DI YOU INC.

Un seminario cu ta promete di ta uno unico cu informacion valioso tocante salud mental ‘MENTAL HEALTH IN BUSINESS: BODY-MIND-SOUL’ TA E DI OCHO SEMINARIO DI YOU INC.

by Admin
0 comment 77 views

Diasabra awo lo tuma luga e di ocho seminario di You Inc. 2023 organisa pa Rotaract Club of Aruba. Un seminario cu durante añanan a crece y bira uno cu ta bon atendi pa tanto hoben como adulto. E aña aki, despues di dos aña di ausencia, Rotacact Club of Aruba ta bin bek cu You Inc. cu lo tin como topico ‘Mental Health in Business: Body.Mind.Soul’. 

 

Salud mental ta un topico cu ta toca nos tur, mas ainda mirando e ultimo desaroyonan cu tin riba nos isla y tambe rond mundo. Esaki lo ta un seminario unico y interesante pa tur esnan cu kier sa mas di e importancia di salud mental pa nan bida personal, pero tambe bida profesional. E mainta aki lo conta cu tres orador, cada un lo cubri un topico. Como orador pa cu e topico di ‘Body’ lo tin Dr. Sandy Roga, un di Aruba su dokternan quiropractico cu lo elabora riba e topico di nos sistema di nervio y con esaki ta relata na nos salud mental, e parti personal y tambe na trabou. Pa elabora mas riba e topico di ‘Mind’ lo tin como orador Shanti, un entrenador di ‘Mindfulness at Work’, cu lo trata e topico di stress na trabou y lo duna herment pa por enfrenta esaki. Finalmente, pa e parti di ‘Soul’, Anthony Martina cu ta un ‘entrepreneur’ y ‘storyteller’, lo conta di su propio dificultadnan na trabou y den su bida priva y con e a sa di surpasa esakinan. 

 

Moderacion lo ta den man di nada mas y nada menos cu Mauro Caralps cu ta un figura conoci den nos comunidad. Mauro tin su mesun podcast titula ‘Self-Making’ y lo ta encarga pa guia e publico presente, oradornan y tambe e panelistanan durante e mainta aki. Como guia virtual lo tin Mingli Chung cu ta un ‘Business Coach’ cu tambe lo guia esnan presente por medio di ‘pop-ups’ virtual, dunando un ‘flow’ na e evento aki y tambe palabranan sabio cu sigur lo ta di bon uso pa tur esnan presente.

 

E mainta lo conta tambe cu tres panelista cu lo discuti riba locual e oradornan presenta, treciendo dilanti nan propio experiencia. E panel lo conta cu Luenne Pieters, Directora di Departamento di Impuesto, cu lo provee esnan presente cu su storia como mama, directora y studiante di MBA y con el’a surpasa dificultadnan den su bida profesional. Otro persona cu lo forma parti di e panel lo ta Veer Alwani di ‘Becoming Veer’ cu lo conta su storia como un hende homber transgenero y con esaki ta afecta su salud mental na trabou. Finalmente, e panel lo conta tambe cu Diana Salcedo cu ta un psicologo y cu lo comparti su opinion profesional riba salud mental na trabou y tambe den bida personal.

 

Rotaract kier gradici nos sponsors cu ta yuda pa haci e evento aki uno exitoso un bes mas. Danki na Setar, Aruba Airport Authority y tambe Way of Life -Health Coaching Services.

 

E seminario You Inc. ‘Mental Health in Business: Body-Mind-Soul’ lo tuma luga diasabra awo, 27 di mei di 9’or di mainta te cu 1’or di merdia den Hilton Ballroom. Entrada ta costa AWG 100,- y ta obtenibel via Pay.aw. Bin haya sa mas di con nos curpa ta maneha stress, haya herment con pa maneha stress na trabou y yena bo alma cu energia. Keda inspira y motiva pa logra bo metanan personal y profesional. Nos ta warda bo!

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio