Dia 21 di mei ta cumpli 20 aña cu Papiamento a keda oficialisa door di Parlamento di Aruba como idioma oficial di Aruba banda di Hulandes. Desde e momento eynan, tur corespondencia oficial, por ehempel, un carta dirigi na Gobierno por ta na Papiamento of na Hulandes.
Nos idioma Papiamento ta un di e simbolonan nacional di identidad esencial cu ta forma parti di nos herencia cultural, y ta e vehiculo mas uza como medio di comunicacion. Papiamento ta e lenga materno di gran mayoria di nos poblacion, e ta conecta nos cu otro, pa crea momento bunita y inolvidabel. Papiamento t’e wes’i lomba di nos historia y desaroyo. E ta curason di nos cultura. Papiamento ta uni nos como Pueblo pa hunto nos genera amor y respet pa cultura di nos Pais.
E resultado di e Censo piloto di aña 2019 ta mustra cu Papiamento ta e idioma mas uza na cas. Di e 4 idiomanan mas papia den e hogarnan na Aruba, 80% ta papia Papiamento. Mayoria persona cu no ta naci na Aruba, 58%, ta papia Papiamento na cas. E cifranan aki ta mustra cu Papiamento ta e idioma preferi pa nos comunica cu otro.
Minister di Cultura Xiomara Maduro ta extende un invitacion pa cada un di nos haya reflexiona riba e balor cu nos ta duna na nos idioma Papiamento. Papia y skirbi Papiamento ta un responsabilidad di nos tur. Ban nos tur siña aprecia, stima y cuida nos idioma Papiamento, pa nos mes y pa nos futuro generacionnan.
