Recientemente riba dos diasabra (10 y 13 di mei 2023), Departamento di Mucha y Hoben (DMH) conhuntamento cu Grant Thorton a brinda e cabesantenan di Centronan di Cuido di Mucha un workshop completamente gratis basa riba e topico di mundo di impuesto pa empresario chikito.
Esaki tabata a base di peticion di e Centronan di Cuido mes, den relacion cu e peticion oficial na DMH pa haya nan permiso di operacion y tambe pa tin cierto conocemento specifico relaciona cu e topico di ta un empresario na Aruba.
E topiconan cu Grant Thorton a presenta tabata; e tipo di ‘rechtsvorm’ y kico ta nan bentaha- y desbentahanan relaciona cu impuesto; inkomstenbelasting (bentaha y desbentaha) y tools pa yena aangifte; winstbelasting (bentaha y desbentaha) y tools pa yena aangifte; informacion relevante tocante BBO/BAZV/BAVP como empresario; e cambionan den belastingstelsel desde january 2023 y cumplimento cu impuesto y deadlines (compliance).
A conta total durante e dos dianan aki cu 42 Centro di Cuido di Mucha cu a participa na esaki. Durante e workshop aki, cu a dura total 3 ora, e cabesantenan a haya informacion valioso riba e diferente rechtsvormen pero tambe a repasa e yenamento di inkomstenbelasting y a enfoca tambe riba cambionan interesante cu tin pa loke ta trata impuesto na Aruba.
Departamento di Mucha y Hoben (DMH) kier gradici Melina Rangel, Emily Maduro y Lance Henriquez di Grant Thorton pa nan excelente presentacion y splicacion, cu sigur a contribui grandemente na e conocemento di e cabesantenan di e Centronan di Cuido di Mucha na Aruba.
