Departamento di Mucha y Hoben (DMH) ta enfoca riba Dia di Mama, cu ta un dia special pa honra y aprecia e mamanan pa nan amor, cuido y sacrificio. Pero tambe ta un oportunidad pa reconoce e rol importante di mama den lanta y cria nan yiunan. E derechonan di mucha ta estrechamente vincula cu e rol di mama den nos bida. Pa DMH ta importante pa accentua, cu den e Tratado di Derecho di Mucha ta duna reconocemento na mayor, particularmente, e mama, cu ta hunga un rol crucial den promove y protega e derechonan di mucha.
Nificacion di ta MAMA
Ta mama no kiermen solamente cambia pampers, laba boter of bringa cu e muchanan pa nan come. Ta mama kiermen cambia bo bida, bo tempo y bo forma di pensa pa bo yiunan. Kiermen duna tur bo curason y entrega bo forzanan cada dia pa saca bo yiunan dilanti den bida y siña nan con biba, cu principio, norma y balor. Ta mama ta nifica, cu bo tin un motibo di existencia pa resto di bo bida. Bo mester kier probecha y saca lo maximo cada momento.
Bo ta yena cu sentimento, na momento cu bo ta wak bo yiunan crece y bo ta sinti un felicidad, dicha y na mesun momento, nostalgia, segun bo ta wak nan avansa den bida, cu e pasonan solido, cu abo a inculca.
Amor eterno y infinito
Si tin un amor cu nos por yama berdadero, ta e amor sincero di un mama, un amor cu na mesun momento ta eterno y infinito. Ta mama ta implica sigui e pasonan di algun maestro chikito, cu sin cu nan mes sa, nan ta siña nos stima di un manera incondicional. P’esey ta mama kiermen, cu nunca mas bo lo ta bo so den pensamento, pues un mama semper mester pensa dobel: pa su yiunan y p’e mes.
Maternidad no kiermen hari semper, sino tambe yora. Ta hopi anochi di insomnia, coremento, emergencia y duda un mama ta experiencia. Pa un mama ta haci mas dolor cu otro hende, pa bisa su yiunan NO. Pero nos sa e importancia di pone limite den bida y esaki ta importante pa nos yiunan siña tambe. Un mama semper kier pa su yiunan bay bon den bida, pero tambe nan kier pa nan haya reto y siña enfrenta nan, cu e hermentnan di bida, cu un mama a ekipa su yiu cu ne. Un mama ta wak, mihor cu tur hende, e defectonan di su yiunan, sinembargo pa acepta esaki y no sconde, ta un reto. Un mama sa si su yiunan ta bon, cu djis door di wak nan.
Ehempel di curashi y amor
Probablemente un mama cu ta sacrifica su meta-, aspiracion of su bida pa su yiunan, no ta hacie un mama heroe, pero si e persona mas tenaz y generoso di mundo. Durante e anochinan cu e yiunan ta lanta cu keintura, nan ta enfrenta mundo y supera tur nan miedo, destaca den bida y protega nan prome cu tur cos; esey ta loke ta haci e mamanan e mihor ehempel di balentia y amor. Pasobra mama ta e personan di mas fuerte di mundo. Su debilidad ta su punto fuerte y esaki semper lo ta e sintimento di amor infinito y eterno pa su yiunan. Feliz Dia di Mama!