United Nations a proclama den un asamblea general na 1993 cu dia 15 mei ta wordo cataloga como dia internacional di famia. E meta principal pa conmemora e fecha aki ta pa conscientisa comunidad di e importancia y balor di un famia, tambe pa pone atencion na e retonan cu tin impacto ariba famia mundialmente.
Famia: e pilar di un comunidad
Pa un persona por funciona debidamente den un comunidad e mester di personanan den su cercania cu por crea un ambiente di sosten y apoyo den su bida diario. Cu otro palabra un pilar cu ta brinda structura y siguridad basa riba amor incondicional. Nan ta e personanan cu lo wak bo potencial y laga bo mira e miho di bo mes como persona. Den mayoria caso ta trata di un pareha y yiunan of un familiar. Tin varios dicho cu ta bisa cu tras di cada persona excitoso tin un hende cu ta para su tras pa apoy’e. Famia tin un rol masha importante pa cada ciudadano den nos cominidad, como cu e ta reenforsa individuonan pa carga e tarea di hiba su mes, su famia y nos cumindad dilanti.
Dia pa celebra hunto cu famia
Ta importante pa pone atencion na e balor agrega di ta forma parti di un famia. Disfruta di otro su compania, atencion y sosten. Dia 15 mei tur aña ta wordo celebra e dia di famia mundialmente, pero nos por dedica y celebra cada momento cu ta posibel, sin necesidad di warda riba e fecha oficial. Tin diferente manera cu nos por pasa tempo hunto den famia por ehempel, hunga wega di mesa, domino of actividadnan recreacional, manera probecha di naturalesa of bay haci ehercicio hunto. Si ta amante di pelicula por wak film hunto. Tur esakinan pa por reenforsa e laso y tambe pa crea memorianan cu un balor sentimental cu lo dura pa semper. Pabien na tur famia di Aruba cu e celebracion di dia internacional di famia di parti Fundacion Tienda di Educacion.
Tocante Fundacion Tienda di Educacion
Fundacion Tienda di Educacion a wordo funda riba 18 mei 2012 y tin como meta pa yuda mayornan y educadornan na tal forma cu nan habilidad pa soluciona problema di educacion di nan yiu, ta mehora. Mayor y educador por tuma contacto via 161, FB-messenger of e-mail pa conseho, sosten y guia. Den su trayectoria Fundacion Tienda di Educacion a brinda mas cu 400 tayer na e comunidad di Aruba tocante diferente topico di desaroyo y lantamento di un mucha. Tambe a duna consulta sea telefonico of personal na mas cu 4000 occasion na mayor y educador. Pa e profesional of studiante tambe Fundacion Tienda di Educacion tin un significacion importante. Tur profesional of studiante por por acudi cu pregunta na e organisacion. No obstante cu Fundacion Tienda di Educacion ta consisti di solamente 3 empleado e organisacion sa di brinda tur su servicionan cu dedicacion, pasion y experticio.
Fundacion Tienda di Educacion ta situa den edificio di Centro Pa Hoben y Famia, Sabana Blanco 68-C. Orario di servicio ta di dialuna pa diabierna, 8 am – 6 pm. Pa contacto yama 161, manda un mensahe via Facebook Messenger of un e-mail na [email protected]. Pa keda bon informa like y follow nan Facebook & Instagram Page of bishita nan Website y YouTube Channel pa mas informacion.