Secretario General di MEP a haci un investigacion profundo riba e manera di maniobra di Mike Eman y AVP. Mike Eman den su historia no por a maneha ni su propio negoshinan y esaki a refleha tambe e manera cu casi el a manda Pais Aruba bancarota, creando un mega debe. Si no ta pa e mega debe aki crea entre aña 2010 y 2017, Aruba lo a traspasa door di e pandemia te hasta sin ayudo di Hulanda.
Mike Eman a manda tres (3) negoshi propio failliet:
Mike Eman na tres (3) ocasion a presta suma grandi pa purba mantene EMCO na bida. Maneho di Mike Eman a manda EMCO finalmente failliet. Adhunto prueba di prestamo di 2 miyon florin na 0% interes (Mike cu Henny so por presta na 0% di interes). E deal y suma aki a wordo haci via Interbank, unda Notaris Eman mes ta esun cu a pasa e actanan. Despues di esaki, a causa cu Interbank tambe a bay failliet. Finalmente, e planta di television ATV canal 15 di Mike Eman tambe a bati bancarota. Cu e mesun actitud aki Mike a maneha Aruba creando e mega debe y hera manda nos Pais Aruba bancarota.
Debenan den apenas 8 aña di Mike Eman y AVP:
Mike a logra redobla e debe di Pais Aruba. Di acuerdo cu rapport di Banco Central, Mike Eman y AVP a presta 2200 miyon florin pa cera deficit di e presupuestonan den 8 aña. Un masacre y mal maneho total. Solamente na interes, Aruba ta pagando 260 miyon florin pa aña, cual ta igual na 712 mil florin pa cada dia di 365 dia pa aña. Tristo no!? Pueblo sa cuanto scol por a construi cu e placa aki? Pueblo sa cuanto cancha deportivo por a drecha? Pueblo por compronde cuanto caretera por a wordo asfalta? Asina nos por sigui. Banda di esaki, Mike a trece e concepto di PPP projecten, unda awo Aruba ta pagando 82.4 miyon florin pa aña pa e proyectonan aki te aña 2037. Cada baby cu nace tin un debe di 50 mil florin riba su cabes. Danki na maneho bochornoso di Mike Eman y AVP. Speed y Patrick Paskel a cobra 8 miyon den 8 aña pa propaganda gobierno di AVP. Tin tur prueba y a reparti esaki den Parlamento di Aruba. Richard Arends cu su compania, Horizon Consultancy a strica 4 miyon florin pa duna conseho na Mike Eman y AVP. Mike a malgasta 1 miyon den “green conferences”, 150 mil florin pa apertura di un brug na Spaans Lagoen, miyones na locura di Paul Krugman y Al Gore, 2 miyon florin na un boto di Wubo Occkels, 10 miyon florin na Phillips y TNO, su amigo personal abogado Sjiem Fat 5 miyon florin, 20 miyon florin di RDA cu tres (3) apertura na un refeneria cu nunca a habri, Richard Arends cu salario di 22 mil florin pa luna den RDA, Rapport BO Aruba (2018) a specifica un otro 1600 miyon florin cu nunca Benny ni Mike kier a contesta, 300 miyon na “hedging” cu a bay ful robes den WEB y asina nos por sigui. Debe di Aruba cu te na aña 2009 tabata bou 50% y den cuadro cu IMF a surpasa 90% na aña 2017. Pues un maneho fuera di control y realidad. Danki na pueblo cu a logra kita e stuur y poder di Mike Eman y AVP, sino awe nos ta pio cu Venezuela. Esaki ta sin conta e miyones di corupcion di Paul Croes y Benny Sevinger, ex-ministernan di AVP. Algo ta sigur y ban grab’e den piedra. Nunca, pero nunca mas AVP por bini na poder pa Aruba ta salba!