Socotoro/Bushiri:
Diasabra algo prome cu 6’or di mainta, durante patruya polis a bin topa cu un Kia Sportage cu a ocasion un accidente un rato prome na un crusada den Professor Lorentzstraat, e chauffeur di e Kia Sportage no a para pa su responsabilidad y a sigui core. E patruya cu a topa cu e Kia Sportage mesora a dicidi di sigui esaki, asina a start un persecusion, mesora e patruya a pidi pa refuerso di coleganan. E persecusion a bin caba na Bushiri den area di e gayero,
E kia Sportage bayendo direccion di e gayero den su afan pa core pa polis a pasa ranca un palo di lus por completo, e no a para pero a sigui bay direcion di e gayero, caminda e labin yega na un dead end, na altura di e e tire repair shop. Aki mesora polis a logra detene e hoben chauffeur cu no tabata sa di para pa su responsabilidad. E la wordo poni den boei y e polisnan mesora a nota cu e chauffeur un hoben tabata basta bou influencia y tabata herida cu un kap na su cabes.
E hoben chauffeur despues di a wordo deteni a arepenti y a cuminsa pidi e polisnan hopi despensa, tambe e la cuminsa pidi e polisnan na e sitio pa yama su mama p’e y bisa su mama cu e ta bon.
E hoben den e impacto a cap su cabes y tabata sangrando profuso. E polisnan na e sitio a pidi pa presencia di ambulance. Na yegada e paramediconan di ambulance a trata e hoben chauffeur na e sitio y despues a transport’e pa hospital. Un agente policial a bay den ambulance cu e chauffeur deteni pa asina nada no por bay robes.
E hoben a wordo detene pa su actonan hopi iresponsabel, pa core auto bou influencia, pa causa un accidente y no para pa su responsabilidad, pa no respeta ordo di autoridad y sigui core, tambe pa ranca un palo di lus y laga un parti di e bario sin coriente. Elmar mester a presenta na e sitio pa asina reconecta coriente pa e casnan cu a keda sin coriente.
