Lider di Partido Evelyn Wever-Croes: “PARTIDO AVP TA ACADEMIA DI CORUPCION Y CULTURA DI MAFIA”

ORANJESTAD – Durante e reunion publico di dialuna cu a caba den oranan laat di anochi, tawata tin diferente disertacionnan di parlamentarionan di Partido AVP cu a lubida e origen berdadero di e problema di costo di bida halto na Aruba. Esaki, sin duda a cuminsa cu e mesun Partido AVP cu pa hopi tempo tawata tin ladronicia cu placa y negoshi di tereno di pueblo. Un hecho cu manera Huez mes a bisa den su sentencia contra Parlamentario Benny Sevinger, a haci nan ‘stinkend rijk’. 

Durante su disertacion, Lider di Partido Movimento Electoral di Pueblo (MEP), señora Evelyn Wever-Croes a menciona e hecho cu na momento cu Benny Sevinger a wordo condena pa ley como un criminal, partido AVP a sali celebra. Segun e partido di oposicion, nan ta celebra pasobra cu e sentencia aki, ta verifica cu Benny Sevinger ta un tiki corupto y ladron so. Señora Wever-Croes a indica cu e hecho aki no ta solamente un berguensa pa pais Aruba sino tambe ta un muestra clave cu partido AVP ta brasa corupcion. 

Pa cu e resultado di e sentencia aki, Lider di partido MEP, ta dirigi su mes na Miguel Mansur y Mervin Wyatt-Ras pa pidi nan opinion acerca di e sentencia aki, mirando cu nan a indica anteriormente cu nan lo duna nan opinion na momento cu e sentencia sali. Alcontrario di Marisol Lopez-Tromp, cu mirando cu e tabata un sospechoso e tempo ey pa e mesun actonan aki, a abstene di duna comentario. 

Lider di partido MEP tambe a indica, cu e ta convenci, cu apesar cu partido AVP a keda demostra di ta un partido di corupcion, tin representantenan den oposicion cu ta traha cu bon intencion pa pais Aruba. Aki ta unda Lider di Partido MEP a duna reconocemento na e hecho cu Ryçond Do Nascimento a tuma e decision di bandona e partido berde pa asina no forma parti mas di tur e sushedad cu tin den dicho partido. Tambe el a duna su respet na Gerlien Croes cu ainda ta pensando pa kibra cu e corupcion. 

“Partido AVP ta academia di corupcion y cultura di mafia”, señora Wever-Croes a expresa. Segun Lider di partido MEP, unabes bo join AVP, bo ta bira mes corupto cu Benny Sevinger. Tambe el a indica cu e partdio berde ta un cultura di mafia na unda ta facil pa drenta, pero dificil pa sali bek ya cu nan tin un file riba cabes di tur cu afilia nan mes na e partido aki. E file aki por contene informacionnan corecto of falso, pero e lo wordo uza door di e “old school boys” pa menasa esnan cu bandona e partido.