LABHOH ta e prome den region Caribe cu tin un rapport ‘Caribbean Map (CarMap)’ pa aña 2022. Cu esaki LABHOH tin e primicia pa loke ta data den e lucha contra resistencia di antibiotica. Hunto cu e Centro di combati infeccion di e Instituto di Reino pa Salud Publico y Medio Ambiente (RIVM-Nederlandse Rijksinstituut voor Volksgezondheid en Milieu) LABHOH a inicia cu e programa unda cu tur data ta wordo colecta na un manera automatico y alabes anonimo pa asina por genera trends den resistencia di antibiotica. Esaki ta un sistema di informacion vigilante di malesanan infeccioso particularmente resistencia na antibiotica.
Pa departamento di Microbiologie di LABHOH e CarMap ta un logro grandi. Durante ful un aña a colecta data segun e regla y normanan stipula pa RIVM pa asina por yega na ful e raport pa aña 2022. Ta demostra cu nos mesun LABHOH por maneha data, haci comparacion y interpretacion na un manera profesional pa asina por contribui na un cuido optimal pe pashent.
Asina tin deteccion constante pa loke ta e desaroyo di bacterianan ‘peligroso’ of resistente, y awo tin esaki registra oficialmente.
Resistencia di antibiotica ta un problema mundial y creciente. E tin retonan hopi grandi den salud medico. Bacterianan ta adapta nan mes y bira resistente na antibiotica y e curpa no ta reacciona mas na e antibiotica duna. Door di monitor esaki na Aruba nos por haya un bista den e patronchi di resistencia di bacteria y por preveni cu nos por confronta retonan imprevisto.
E meta mas importante di e CarMap ta pa analisa trends den resistencia antibiotica den Caribe. Pues, intencion ta pa mas laboratorio den Caribe tambe participa na e programa aki pa asina nos por tin miho bista y hasta por haci comparacion den e resistencia antimicrobial den nos region. Tambe por compara data cu Hulanda y por compara si tin diferencia relata ne region y e populacion. Basa riba esaki posiblemente por haci futuro adaptacion den loke ta e antibiotica duna na pashent pa un cuido optimal. Por lesa ful e rapport riba website di LABHOH, esta www.labhoh.org bou di e tab news of tambe e link directo: https://bit.ly/3Nh0L6W
E caminda ta largo y no facil, pero hunto cu nos mesun profesionalnan, nos ta avansando unda cu data ta esencial pa contribui na calidad den cuido medico. Masha pabien na LABHOH cu otro paso positivo den loke ta optimalisa cuido medico pa Aruba su comunidad!
FIN