ORANJESTAD: Diabierna atardi, na Cruyff Court Denzel Dumfries na Jaburibari a tuma luga e gran apertura di Weganan Interinsular 2023. Despues di shete aña Weganan Interinsular entre e scolnan di Aruba, Boneiro y Curaçao ta tumando luga bek. Manera ta conoci, den luna di september di aña pasa, Minister di Enseñansa, Ciencia, Cultura y Deporte di Curaçao, Sr. Sithree van Heydoorn, Diputado di Infrastructura y Deporte di Boneiro, Sr. James Kroon y Minister di Enseñansa y Deporte, Sr. Endy Croes a firma un acuerdo pa trece e competencia escolar bek. Na luna di maart di e aña aki Weganan Interinsular 2023 a inicia na Boneiro unda cu e scolnan a participa den e disciplina di dam y schaak. Sigui na Curaçao, unda e hobennan a participa den e disciplina di atletismo y trefbal.
Fin di siman, Weganan Interinsular a continua na nos dushi isla. Durante e ceremonia di apertura di Weganan Interinsular Diputado di Boneiro Sr. James Kroon, Minister di Curaçao, Sr. Sithree van Heydoorn, Presidente di Parlamento di Aruba, Sr. Edgard Vrolijk, Minister Endy Croes, Minister Dangui Oduber, Parlamentarionan di Coalicion: Sra. Shailiny Tromp – Lee, Sra. Darlaine Guedez – Erasmus, Sr. Ricky Hoek, Sr. Marco Berlis, Sr. Raymond Kamperveen y demas invitadonan presente a presencia un bunita desfile, impresionante show di acrobaat di RCC Aruba y NGS Unique brassband. Un atardi special yena di emocion, musica, color y alegria.
Minister Endy Croes a hiba palabra unda a enfatisa cu deporte ta un medio pa forma y crea lider y personanan cu habilidadnan pa organisa y guia otro riba diferente tereno. P’esey un pais mester crea e base y condicionnan pa su habitantenan y particularmente pa nos chikito- y hobennan pa por haya oportunidadnan pa desaroya nan mes den deporte, recreacion y actividad fisico. Actividad fisico y recreacion ta yuda mantene e curpa saludabel y deporte ta yuda un atleta cu’n dia den futuro lo por participa den weganan auspicia pa federacionnan di deporte localmente y representa su pais internacionalmente for di Weganan Escolar Campeonatonan Regional, Mundial y ohala den Weganan Olimpico.
Mandatario di Deporte a sigui bisa cu hunto y cu henter e desaroyo aki e parti di educacion ta hunga un rol sumamente importante. E formacion na scol hunto cu e lesnan di educacion fisico ta brinda un base general pa crea hobennan prepara pa desaroya nan mes den futuro den cualkier ramo of profesion. Tambe nos lider y tecniconan den deporte merece di haya oportunidad pa forma nan mes y asina yuda den e desaroyo di formacion di atletanan. P’esey un palabra di gradicimento na tur maestro di scol, tecniconan di deporte, boluntarionan y specialmente na e mayornan di nos hobennan cu awe ta participa den Weganan Interinsular 2023, masha danki y sigui stimula nos muchanan pa sigui practica deporte. Weganan Interinsular entre nos islanan ta un medio di intercambio deportivo, cultural y social pa cera e lasonan di hermandad y brinda oportunidad na e muchanan cu kisas di otro manera lo a bira dificil pa sali for di nan isla. Finalmente, Minister Endy Croes a yama bonbini na e delegacionnan di Boneiro y Curaçao acompaña pa nan respectivo mandatarionan y pa nos deportistanan di Aruba y a desea nan hopi exito.Cu e deseo, disciplina, dedicacion y determinacion boso ta logra!
