ORANJESTAD – Diahuebs merdia, Openbare Ministerie a saca un carta indicando cu e ta cera e investigacion contra Minister Glenbert Croes riba e keho duna contra su persona relaciona cu posibel circulacion di “bewijzen van terugkeer” falso.
Manera ta conoci, na 2022, OM a ricibi un keho di sra Katy Paskel y sr. Andrew Hoo contra Minister Glenbert Croes, acusando su persona di ta emiti bvt sin authorisacion. Inmediatamente, OM a duna ordo na Landsrecherche pa cuminsa cu un investigacion riba e reglananan pa loke ta trata emision di un bvt. Despues di a investiga e leynan y reglanan relevante , y scucha varios testigo, no e keda OM nada mas cu tuma e decision pa cera e caso aki ya cu no por a identifica ningun hecho castigabel contra e mandatario.
Como Minister, sr Glenbert Croes ta autorisa pa saca un bvt. Normalmente, e procedimiento ta cu e peticion pa saca un bvt ta bay via DIMAS, pero na ningun momento esaki ta nifica cu su persona no ta autorisa pa emiti un bvt. Cu e declaracion di OM, e caso ta wordo cera y Minister Croes ta wordo declara inocente di e kehonan haci contra su persona. OM a desbarata e kehonan haci pa sr Paskel y sr Hoo mustrando asina cu Minister Glenbert Croes ta traha na un manera responsabel y digno pa pais Aruba.