Pa mas cu siete aña Stichting Monumentenfonds Aruba (SMFA) a busca pa haya un partner interesa den e edificio na Wilhelminastraat 7. Un di e edificionan cu un balor historico grandi y cu un arkitectura unico na Aruba. Awe ta un dia special caminda cu SMFA por anuncia na e comunidad di Aruba cu a logra yega na un acuerdo cu e famia pa compra di e edificio conoci como ‘Cas Veneranda’. Tur esaki den cooperacion cu Gobierno di Aruba despues cu Minister Geoffrey Wever a mustra interes pa muda algun di su departamentonan den edificionan historico den e area di Oranjestad. Despues di a discuti algun posibilidadnan a yega na acuerdo mutuo cu Cas Veneranda lo ta e edificio ideal pa e Departamento di Asuntonan Economico (DEACI).
Acuerdo
Dia 20 di april, Minister di Economía sr. Geoffrey Wever conhuntamente cu Directora di Monumentenfonds y den presencia di e bestuur di SMFA, APFA y representante di e famia Arends, doñonan di Cas Veneranda, a anuncia acuerdo pa compra ,restauracion y huur di e edificio di Cas Veneranda. Awor SMFA lo por continua e plannan pa restauracion.
Restauracion
E siguiente fase ta pa haci e investigacionnan necesario, apunta un arkitecto, diseño di e proyecto, prepara e proyecto pa bay destaho y finalmente inicia e restauracion. Nos ta calcula cu e restauracion lo tin un duracion di aproximadamente dos aña. Por lo tanto, lo por conta cu pa 2025 por wak un Cas Veneranda completamente restaura. E edifico lo conta tambe cu un espacio pa un restaurant/cafe cual lo haci cu e monumento lo ta accesibel pa publico tambe y no lo fungi solamente como oficina.
Proteccion
E edificio te cu awor no tabata conta cu proteccion cual sigur ta un riesgo grandi pa por bay perdi den mannan di inversionistanan cu no ta wak e balor historico su tras. Na momento cu Stichting Monumentenfonds Aruba conclui e compra di e edificio lo haci un peticion na Monumentenbureau pa proteccion, y asina indica e edificio como un monumento.
Financiamiento
E proyecto lo ta financia pa Nationaal Restauratiefonds di Hulanda (NRF) y Stichting Algemeen Pensioenfonds Aruba (APFA) cu un prestamo na interes abou na Stichting Monumentenfonds Aruba. Recientemente durante un bishita na Aruba NRF a bishita e edificio y a confirma nan interes pa financia e proyecto. Pa por a haci e proyecto aki posibel Minister Geoffrey Wever a percura pa un contribucion di un suma di 690 mil florin den forma di un subsidio (eenmalig) pa e compra di e edificio.
Historia Cas Veneranda
E edificio impactante den Wilhelminastraat a keda construi na 1936 pa Frederico Maximiliaan (Machi) Arends cu tabata e consul di Spaña.
E arkitecto tabata e conocido bouwmeester Dada Picus, cu a bay te Cartagena Colombia pa haya inspiracion for di un edificio cu esposa di Machi, Maria Veneranda, tabata encanta cune y asina a bin Aruba bek pa construi e edificio cual awe nos conoce bou di e nomber di Cas Veneranda. Un di e casnan mas grandi na Aruba den e tempo ey construi den un estilo neobarroco latinoamericano.
Aparte di tabata un vivienda akinan tambe tabata tin un flowershop, un lugar pa bende ijscream y e consulado di Spaña. Durante añanan nobenta a comberti e edificio den Papiamento restaurant. Despues cu e restaurant a sali di e edificio esaki a keda bashi y na 2014 un candela grandi a destrui gran parti di e interior. Pa seguridad a cera e edificio cual pronto lo keda completamente restaura y lo conoce un funcion nobo.
Stichting Monumentenfonds Aruba
Stichting Monumentenfonds Aruba ta existi for di aña 1996 y ta un organisacion no gubernamental encarga cu adkiri, restaura, huur y mantene monumentonan di Aruba. Banda di esaki tambe ta pone enfasis riba educacion y conscientisacion tocante e importancia di nos monumentonan como parti di nos herencia cultural. Cas Veneranda ta bira e di 17 monumento cu ta propiedad di Stichting Monumentenfonds Aruba.
Den bon cooperacion cu famia Arends, Minister Wever, SMFA, Nationaal Restauratie Fonds y APFA nos lo logra di preserva Cas Veneranda y su historia pa futuro.
