E LEY TA PA CUMPLI CU PRINCIPIONAN DI BON GOBERNACION Y TRANSPARENCIA
Dialuna den Parlamento a tuma luga e reunion publico pa trata e ley MKB. Esaki ta e ley pa formalisa e sosten financiero cu Gobierno di Aruba a duna durante e tempo di pandemia na compananianan chikito y mediano. Cu e ayuda aki, companianan chikito y mediano a logra sobrevivi y keda riba pia. Durante e reunion publico, Lider di MEP, Prome Minister Evelyn Wever-Croes a ricibi y contesta varios pregunta di Parlamentarionan.
Pa contesta Parlamentario Marisol Lopez-Tromp, Lider di MEP a remarca cu e landsverordening MKB ta sigui e mesun linea cu landsverordening FASE y landsverordening loonsubsidie, esta cu pa motibo di e circumstancianan hopi exceptional, causa door di e pandemia di COVID-19 y su consecuencianan grave pa Aruba, no por a warda cumplimento formal di e trayecto legislativo, pero mester a actua inmediatamente.
Lider di MEP a enfatisa tambe cu Parlamento a ser informa por escrito door di e Minister di Finansa Xiomara Maduro tocante e aplicacion di e MKB regeling. Parlamento a bay di acuerdo of en todo caso no tabatin niun obhecion e tempo ey. P’esey den e landsverordening MKB tambe ta papia di “gedektverklaring” y no di un ‘machtiging achteraf’, ya cu e pagonan a tuma luga y tabata na beneficio di e recipientenan, mescos cu den caso di FASE y Loonsubsidie.
Algo hopi remarcabel ta, cu mescos cu den caso di FASE y Loonsubsidie cu den CC Parlementario Lopez-Tromp no a haci ningun pregunta of remarke riba e punto aki, (e informe di Parlamento tabata hasta blanco!) pero ta warda te ora e reunion publico bin pa trece nan preguntanan dilanti.
Por lo tanto, riba e insinuacion di Parlementario Lopez-Tromp cu e reunion publico di dialuna 18 di April pa trata e Ley di MKB tawata pa absolve Minister Xiomara Maduro, Lider di MEP, Evelyn Wever-Croes a enfatisa cu esaki no ta e caso. E ley ta pa cumpli cu principionan di bon gobernacion y transparencia. Gobierno di Aruba a tuma responsabilidad durante pandemia y a percura pa companianan chikito y mediano haya un sosten economico di 4 mil florin pa kwartaal pa asina nan por keda riba pia. Y cu aprobacion di mayoria den Parlamento, e ley a wordo formalisa.