Dialuna mainta Minister di Turismo y Salud Publico, sr. Dangui Oduber a ricibi director di Organo Ehecutivo (OE) di AZV, ir. Edwin Jacobs, kende a haci entrega di e relato y cuenta anual di e fondo di AZV di aña 2022.
Minister Oduber ta satisfecho cu OE di AZV ta na tempo cu su cuenta anual, cual ta importante pa e sector di cuido.
Ta resalta for di e relato anual e impacto sumamente positivo di e crecemento di turismo riba e entradanan di e fondo di AZV. Esaki tabata di tal forma cu e fondo a logra cubri tur su gastonan y minimalisa e contribucion di gobierno na e fondo.
Presupuesto 2022
AZV a cuminsa 2022 proyectando entradanan di prima y BAZV na 460,2 miyon florin, mientras a calcula cu e gastonan total di e fondo lo alcansa 462,9 miyon florin, inclusief recortenan den cuadro di e di 5 wave di COVID19. Esaki lo a nifica cu pais lo mester a contribui cu 2,9 miyon florin.
Resultado 2022
E crecemento impresionante di turismo na 2022 a resulta cu na final e entradanan di e fondo tabata 26,7 miyon florin mas cu e proyeccion. Mientras e gastonan a resulta 16,5 miyon florin mas cu proyecta. Esaki debi na entre otro cu no a alcansa na implementa e programa di 5 wave manera premira.
Durante cu e aña tabata avansando a premira un crecemento grandi di e entradanan di e fondo y esaki den combinacion cu e contribucion di sector cuido y di aseguradonan, a logra crea un espacio pa inversion. AZV den deliberacion cu Ministerio di Salud Publico a destina un poco mas cu 9 miyon florin na inversion den cuido di nos pais, manera den entre otro:
- compra di ambulance;
- contribucion na Imsan pa atende cu lista di espera den retinologia y ampliacion di cuido di wowo;
- contribucion na hospital pa atende lista di espera den e ramonan di radiologia, urologia y gastroscopia;
- compra di 14 stul nobo di dialyse;
- contribucion na un software pa conecta dunadornan di cuido, laboratorionan y AZV;
- contribucion na atende lista di espera pa cu salud mental;
- contribucion na prevencion.
Resultado positivo pa e fondo
Na final di aña, BAZV a conoce un crecemento adicional cu no a premira. Esaki tabata tin como consecuencia cu e fondo di AZV a conoce un resultado positivo chikito di 1,5%. E resultado chikito aki a keda destina pa inverti bek den cuido den e fortificacion y transformacion necesario di nos sector di cuido, preparando esaki pa e retonan di futuro.
Cuadro financiero multi anual
Final di aña pasa, Gobierno di Aruba a encarga AZV pa desaroya e instrumento di cuadro financiero di mas aña. Esaki como meta pa presenta pa reemplasa e recorte di 60 miyon florin. Sr. Jacobs a informa cu AZV hunto cu expertonan local ta trahando pa presenta e proyecto aki proximamente.
Preocupacion
Na final, sr. Jacobs a indica cu mirando cu economia a alcansa bek su nivel di 2019, e tema di migracion ta bira actual atrobe y esey ta presenta su retonan pa e sector di cuido y e fondo di AZV. A palabra cu AZV lo presenta na gobierno su preocupacionnan riba e asunto aki.
Gradicimento
Minister Oduber ta gradici OE AZV, su personal y tur e dunadornan di cuido pa nan contribucion durante 2022 den realisacion di e maneho di Ministerio di Salud Publico y ta mira cu positivismo e desaroyonan den e prome kwartaal di 2023. Hunto lo sigui traha pa pone un fundeshi solido pa Aruba por enfrenta su retonan den salud e proximo añanan.