Boegoeroei: Dialuna den careda di 7’or di anochi un poco panort di Fermins bar un persona a bin topa cu un dama benta abou, mesora e la yuda e dama sinta riba baranca y a pidi ayudo.
Na prome instante a pensa cu e lo a wordo gedal pa un auto cu lo mester a bandona e sitio, pero papiando cu e dama a bin haya sa cu e dama mes a benta su curpa for di e auto di su pareha. Segun e dama e homber tabata bou influencia y lo tabata tin intencion di bay maltrat’e, pa motibo cu no ta prome biaha e ta experiencia esaki, den pasado e homber a yega di maltrat’e caba.
Mesora a pidi pa presencia di polis, na yegada e dama a splica polis kiko a sosode. E tabata den auto cu su pareha pero a surgi un discussion fuerte y e no por a soporta mas y a bula for di e auto. E dama no tabata herida, pero a pidi asistencia di polis, despues cu e dama a bula for di auto, e homber a djis sigui core bay. Un rato despues den area di Paraguana e lo a dal su auto contra algo probablemente un di e barancanan canto di e caminda di Paraguana, pero e no a para y a sigui bay.
Despues cu Polis a splica e dama e camindanan cu e mester cana, nan a dicidi di hiba e dama na cas di e pareha na Sero Patrishi pa busca su pertenencianan, pero e homber no tabata na e sitio. Despues di 9’or e mesun homber aki a bay na un otro adres sigui haci problema, pero ora polis a yega ya e la bay for di e sitio caba.
