A gradici nan tambe pa e confiansa deposita den Aruba
ORANJESTAD – Minister di Labor, Energia y Integracion Glenbert Croes ta informa cu recientemente el a reuni cu e compania Repsol. Durante e encuentro a intercambia visionnan riba tereno energetico y alabes a gradici nan den nomber di Pais Aruba pa e confiansa cu nan a deposita den Aruba den e posibilidad pa descubri gas.
Minister Croes a expresa cu e ta hopi agradecido pa e oportunidad di por reuni cu e Repsol cu a inverti 200 miyon dollar den exploracion di gas na Aruba. E compania aki a sa di demostra nan confiansa y speransa a traves di inversion substancial haci den e posibilidad di descubri gas.
Durante di e reunion cu Repsol Minister Croes a haci uzo di e oportunidad pa amplia riba e vision pa explora gas entre e fronteranan di Aruba y Corsou. Minister Croes a splica cu Compania Arubano di Petroleo, cu ta resorta bou di Ministerio di Energia ta sondeando posibilidad di cooperacion cu compania ruman di petroleo na Corsou, “Kompania di Petroli i Gas Kòrsou (KPG)”, riba cual topico ya un carta a bay pa Minister President di Corsou Sr. Pik Pisas. E meta ta pa hunto entre e frontera di Aruba y Corsou, investiga e indicadornan di posibilidad pa gas entre e dos paisnan aki. Pa esaki, lo ta desea di por haya un empresa di credibilidad manera Repsol, pa ta interesa den e posibilidad di exploracion di gas.
Minister Croes a termina expresando cu e tabata un bon reunion, caminda cu a percura pa laga e speransa di posibilidad bibo cerca Repsol pa posibilidadnan di inversion den futuro.