Problema di pareha y maltrato diariamente tumando lugar ariba nos isla.
Boroncana:
Diasabra algo prome cu 11’or y cuarto di anochi, presencia di polis cu hopi urgencia a wordo pidi na Borocana. E motibo pa bay yuda un muhe cu tabata scondi den mondi patras di un container cora, pasobra su casa completamente altera lo tabata buscando e dama pa bati’e. Pa evita un maltrato mas severo e dama a dicidi di bay sconde y pidi pa presencia di polis.
Hopi lihe dos patruya di polis a yega na e sitio y na yegada enberdad den e scuridad di anochi a bin topa cu un dama basta spanta scondi patras di un container. E dama a splica polis cu e y su casa a haya un discussion formal y den e discussion aki su casa a cuminsa reclam’e cu e ta haciendo straño y cu e lo ta gañando e cu un otro homber.
Na momento cu e homber a cuminsa bira hopi agresivo, e dama yen miedo, a tuma e desicion di huy for di su cas na Sero Pela, pa asina evita cu cos bay mas for di man y e wordo seriamente maltrata pa su casa. Manera e dama a haya un chens, e la sali na careda for di su cas na Sero Pela y a bay sconde patras di un container cora na Boroncana, caminda e la keda scondi t’e ora cu polis a yega.
Despues cu polis a papia cu e señora, nan a bay na e cas pa atende cu e homber riba su comportacion y a bis’e bon cla cu si algo asina mester bolbe ripiti e lo wordo deteni. Polis a conseha e dama hunto cu su dos yiunan, bay pasa e resto di anochi serca un familiar pa evita cu e problema escala bek y bira peor.
