Hadicurari/Palm Beach: Diabierna algo pasa di 1’or y mey di marduga a sosode un accidente cu 6 persona herida na e rotonde dilanti di Marriott Hotel. Mesora a pidi pa presencia di polis, ambulance y tambe brandweer pa motibo cu na prome instante lo tabata tin hende pega den e auto.
Na yegada a bin compronde cu tabata trata di 6 turista di habla spaño, cu tabata den un auto di huur, un Kia Rio, numera V499. Segun nos a compronde cu dos di e turistanan aki, cu ta pareha, a haya un discussion na Moomba Beach y den auto nan lo a sigui discuti, esaki aparentemente lo a causa cu e chauffeur di e Kia Rio, cu no conoce e caminda aki bon, no lo a pone atencion cu e tabata acercando un rotonde. E no a baha su velocidad na tempo y a sigui straight dal contra e muraya di e rotonde y a bay pega riba e rotonde. E impacto tabata hopi fuerte cu tur 6 ocupante di e V car a keda herida, tur tabata keha di basta dolor na nan curpa. E rotonde tambe a haya basta daño material.
Na prome instante a kere cu un di e ocupantenan lo a keda pega den e auto y a pidi pa materialwagen di brandweer plus un unidad mas di brandweer. Na yegada di e materiaalwagen a bin ripara cu e persona cu na prome instante lo tabata mustra pega a logra sali for di e auto. Materialwagen a bandona e sitio mientras e otro unidad di brandweer a keda, mirando cu tabata tin 6 herido nan a dicidi di keda pa asina nan asisti e personal di ambulance.
Tres ambulance plus e Rapid Responder di ambulance a presenta na e sitio pa cuminsa trata e heridonan y asina a transporta nan pa hospital. Ambulance mester a hiba un herido y bay bek na e sitio di e accidente pa busca otro, 5 herido a wordo transporta pa hospital, e herido cu a wordo trata na e sitio polis a hibe na e apartamento unda nan ta hospedando. Mientras polis na e sitio a cera e caminda y a desvia e trafico, tambe a haci e investigacionnan necesario.
