E prome reunion riba nivel di gobiernonan riba e tema di refinanciamento di e debe
ORANJESTAD – Diaranson 5 di april, Prome Minister Evelyn Wever-Croes hunto cu Minister Xiomara Maduro y ekipo financiero y huridico di Aruba a reuni cu Secretario di Estado Alexandra Van Huffelen y su ekipo. Esaki tabata e prome reunion riba nivel di gobiernonan na unda cu a trata e tema di refinanciamento di e debe grandi cu Aruba tin. Manera ta conoci, momento cu e pandemia a dal na nos porta y e mercado internacional a cera porta riba nos, e unico opcion tabata pa fia placa di Hulanda. Aruba a fia 916 miyon florin cu ta hopi placa. E debenan aki lo madura na oktober 2023 y p’esey ta importante pa hiba e conversacionnan aki awo pa yega na acuerdonan riba e repago di e debe.
Secretario di Estado van Huffelen a anuncia comienso di aña cu na februari lo cuminsa cu e combersacionnan aki. Mientras tanto a tuma luga hopi combersacion riba nivel ambtelijk cu e ekiponan di nos profesionalnan y awo esaki tabata e prome reunion riba nivel di gobiernonan.
“E tabata un bon reunion. Naturalmente mester mas di e reunionnan aki. Aruba awo ta enfoca tambe pa finalisa nos memorandum financiero y economico cu actualmente nan ta trahando na Aruba riba dje pa asina por determina e capacidad di pago. Durante e reunion nan a indica unda nan lo por yuda nos. Awor nos sa kico mester haci y lo sigui dialoga”, Prome Minister a duna di conoce.
Prome Minister a expresa gratitud, den nomber di pueblo di Aruba, di Gobierno di Aruba, pa e ayudo financiero cu Aruba a haya durante e pandemia. “Esaki a yuda Gobierno hopi pa por sigui opera den e temponan di necesidad, pero tambe pa adresa e pandemia cu a causa asina tanto daño y gastonan adicional specialmente medico, di e maneho di crisis (cuarentena, vacuna etc..). Tambe pa prome biaha gobierno a haye ta tuma cargo pa yuda e sector priva. Nos mester a duna e doñonan di trabou un subsidio di salario pa evita cu hendenan ta perde trabou. E empresanan mediano y chikito a haya un sosten financiero, esanan cu a perde trabou a haya FASE, paketenan di cuminda, tur a bin cu hopi gasto y nos entradanan a cay afor na momento cu a cera frontera. Pero danki na e ayudo di Hulanda nos a logra sali afor y awor ta momento pa papia di repago”, Prome Minister Evelyn Wever-Croes a enfatisa.
