ORANJESTAD, Aruba – 5 di April 2023: Relaciona cu e comentarionan negativo encuanto Compleho Deportivo na Mabon, directiva di FFD kier a declara lo siguiente:
For di 2009 te cu 2021 bao di e directivanan anterior, a manera percura pa un deterioro di e 10 facilidadnan deportivo cu ta cay bao Lotto, Land Aruba, A.S.U. y FFD.
E ultimo pues FFD cu tin bao su encargo e mantencion di e facilidadnan pa 12 aña largo a haci cerca di nada. Nos ta bibando e resultado di un pasado di un mantencion caotico y alabes uno costoso. E Directiva actual a haya su mes confronta cu varios facilidadnan den situacionnan alarmante, p.e. , a hereda e realidad cu e directivanan anterior cu a gasta 832 mil florin riba mantencion di Joe Laveist Sport Park cu ta encera 236 mil pa e basketball court y te awe no ta hungando basketball pa motibo cu e cancha a bira pio di locual e tawata. A busca santo pa JLSP cu a costa 400 mil florin pa e infield so y asina por sigui menciona.
E directiva aki a percura pa un plan di mantencion cu a wordo entrega y den corto tempo tur facilidadnan cu ta resorta bao di FFD, lo haya nan debibo atencion, y Mabon Sportcomplex ta un di nan. Den corto tempo Mabon Sportcomplex lo ta operacional bek.
Aworaki ASU (despues di 19 aña), Land Aruba y Fundacion Lotto pa Deporte, a pone un team di hendenan serio y capacita pa dirigi FFD. Pues e directiva aki a hereda hopi negligencia di maneho anterior di mas cu 12 aña y ta haciendo lo necesario pa trece e facilidadnan bek manera mester ta. Nos ta trahando na peticion di tur usuario, p’asina por brinda facilidadnan den un estado optimal pa uzo. Directiva actual ta trahando di un forma transparente y ta habri pa cualkier pregunta y sugerencia cu por tin encuanto nos facilidadnan deportivo.
