Despues di tres dia intensivo di training ARUNADO (comision Anti-Doping di Comite Olimpico Arubano) ta conoce, despues di 7 aña, atrobe un grupo nobo di cinco Doping Control Officer. E grupo nobo aki ta consisti di 2 masculino y 3 femenino.
E Doping Control Officer (DCO), segun exigencianan di Caribbean Regional Anti-Doping Organization (RADO) y e World Anti-Doping Agency (WADA), ta e unico persona autorisa pa colecta muestra (urina) di un atleta pa hasi control di dopahe. Esaki ta e manera pa controla y garantisa cu un atleta ta liber di dopahe y ta eherce deporte limpi, cu otro palabra e ta eherce FAIR PLAY.
Un Doping Control Officer tin como tarea y responsabilidad pa garantisa cu e proceso di e control di dopahe ta tuma lugar segun e criterionan estricto stipula den e World Anti-Doping Code. E proceso ta consisti di diferente pasonan entre otro: notificashon di e atleta, colecshon di e muestra, preparashon di tur e documento y manda e muestra pa un laboratorio acredita.
E tres dianan di traning a consisti di dos parti esta un parti teoretico y un parti practico. Esakinan a bay den un ambiente hopi ameno den cual e cursistanan di comienso a haci hopi pregunta y a trese hopi scenario dilanti cu por econtra durante e proceso di control di dopahe. Na final di e di tres dia e cursistanan mester a haci un examen teoretico y practico.
Tur cinco cursista a pasa e examennan cu puntonan hopi halto pa cual e facilitado a expresa su orguyo di con bon e cursistanan a score. E training a wordo facilita pa e Doping Control Officer accredita pa Caribbean RADO cu amplio experienca riba nivel international, Angelique Koolman.
E Doping Control Officers cu a completa e training ta: Azriah Palm, Marco Dupersoy, Corina Boekhoudt, Shari-Ann Phillips y Shariënne Winterdaal (best geslaagde). Nan a ricibi nan certificado for di representantenan di Comite Olimpico Arubano, sra. Zulema Erasmus y sr. Maarten Willems y tambe representante di Stichting Sportsubsidie Aruba, sr. Tito de Cuba.
Comite Olimpico Arubano ta felicita cada Doping Control Officer nobo cu e bunita logro y ta desea nan hopi exito den cada control di dopahe cu nan lo ehecuta. Un trabou importante cu hopi balor pa asina mantene deporte liber di dopahe.
Tambe ta gradici Stichting Sportsubsidie Aruba cu a pone e fondonan disponibel pa organisa e traning importante aki. Por ultimo ta manda un palabra di gradicimento na Angelique Koolman cu atrobe a haci un tremendo trabou como facilitador di e Doping Control Officer’s Training.
