ORANJESTAD – E homber Dominicano G.H.(44), a presenta awe mainta den Corte pa scucha su sentencia.
ARUBA NATIVE por a compronde cu Hues a haya G.H. culpabel di skimming di mas cu 1385 credit cards entre Juli 2021 y September 2022. E tabata traha den un restaurant den un hotel. Hues ta haya cu G.H. tabata forma parti di un organizacion criminal. Hues a haya e castigo exigi pa Fiscal, 3 aña di prison na su lugar.
A HIT AMERICAN EXPRESS MAS DI 184 MIL DOLLAR
Durante tratamento di e caso luna pasa 17 Maart 2023, Fiscal a bisa Hues cu e caso aki a cuminsa ora cu American Express a haci denuncia na Polis di cu a hit e compania 184.190 dollar, door di falsifica credit cards. Esaki tabata sosode na un restaurant den un Hotel. 21 September 2022 G.H. a wordo deteni y den su camber a haya aparato di skimming y un laptop.
A SACA MAS DI 1385 POTRET DI CREDIT CARDS
Fiscal a mustra cu G.H. a declara cu pa añas e tabatin amistad cu un tal Alex y na dado momento Alex a ofrece pa saca potret di credit cards y ta paga 20 dollar pa potret. Mas cu 1385 potret G.H. a saca di credit cards, di cual 308 ta di American Express. Segun American Express 20 carchi a usa cu casi 184 mil dollar na Merca.
Na opinion di Fiscal, si bay conta tur e carchinan falsifica ta yega den miyones di dollar. El a bisa cu G.H. tin suerte cu ta solamente American Express a haci denuncia.
A SKIM CREDIT CARDS
Fiscal a mustra cu solamente saca potret di credit card bo no tin nada. Mester di informacion di e carchi y data di e carchi. Fiscal a bisa cu G.H. por nenga di a usa e aparato di skimming pero tin sospecho cu e tabata usa esaki y manda informacion riba laptop.
Fiscal ta haya cu G.H. ta forma parti di un organizacion criminal cu tabata dedica su mes cu fraude di credit cards. Ta door di G.H. tur informacion di credit cards tabata wordo manda pa Alex y Diego den exterior durante 1 aña y 3 luna.
PERHUDICA TURISMO DI ARUBA
Fiscal a anuncia cu lo bay cuminsa un caso di kita propiedadnan di G.H., mirando e cantidad di placa cu el a gana pa saca potret di credit cards. Fiscal a bisa cu skimming di credit cards ta sumamente fastioso tanto pa e usador di e credit card y e companianan cu ta facilita credit cards. Esaki ta mina e sistema financiero y ta afecta turismo. Durante un periodo largo, G.H. a traha cu e organizacion criminal. Fiscal ta haya cu mester manda señal bon cla cu no ta tolera esaki cu ta perhudica turismo di Aruba. El a exigi 3 aña di prison pa G.H.
SENTENCIA
Den sala di Corte por a mira cu familiar di G.H. tabata presente.
FORMA PARTI DI ORGANIZACION CRIMINAL
Hues a bisa cu e ta haya legalmente proba cu e homber G.H. a forma parti di un organisacion criminal y a pasa informacion di credit card.
A SKIM CREDIT CARDS
Hues a sigui bisa cu e ta haya cu G.H. tabata saca potret di credit cards, skim e credit cards y manda pa hendenan. Hues a bisa cu e no ta kere e declaracion di G.H., cu e no a usa e aparato di skim.
Hues a bisa cu e caso aki ta hopi serio. A afecta American Express y e clientenan.
CASTIGO
Hues a bisa cu e ta haya e exigencia di Fiscal na su lugar pero teniendo cuenta cu G.H. ta “first offender”, a conden’e na 3 aña di prison di cual 6 luna ta condicional cu 2 aña di prueba.
Por a ripara cu e castigo a dal G.H. duro. El a baha cabez y a cuminsa yora.
|
ReplyForward
|