Menasa serio contra abogado mr. Ruiz cu a yama rumannan Williams pa “zware jongens”
ORANJESTAD – Awe den sala di Corte, cos a bay completo for di man y miembronan di CEA hunto cu agentenan policial mester a actua. Esaki ta relaciona cu e caso penal cu Ministerio Publico a cuminsa contra casa di parlamentario Gerlien Croes y su ruman homber, ambos ta yiunan di Maikel Williams, N.W. y D.A.W. Tambe contra e yiu homber di Promer Minister Wever Croes, K.W. y un amigo T.M.
E cuater sospechosonan ta wordo acusa cu riba 14 November 2021 a causa violencia publico den Azia Restaurant caminda a destrui un cantidad di glas y tambe a herida un chef cook severamente na su man drechi.
ARUBA NATIVE por a compronde cu Maikel Williams a rabia ora cu abogado mr. Ruiz a yama su yiunan “zware jongens”. El a lanta para den sala di Corte y a menaza e abogado. Miembronan di CEA y Polis mesora a gar’e y sak’e for di Corte.
MAIKEL WILLIAMS SACA FOR DI CORTE
Den oranan di merdia, despues cu Fiscal a exigi castigo pa e cuater sospechosonan, a toca turno pa e abogadonan hiba nan defensa. Por a constata cu K.W. a bin cu tres abogado, esta mr. Reinkemeyer y mr. Ruiz cu a hiba palabra y un otro abogado mas di e mesun oficina tabata asisti.
Despues cu mr. Reinkemeyer a hiba parti di defensa pa K.W., mr. Ruiz a sigui. El a bisa Hues cu e dos rumannan N.W. y D.A.W., ta wordo considera como “zware jongen”. E abogado a bisa cu e rumannan scur y cu su cliente K.W. a actua den defensa propio. Esaki no a cay den bon tera serca e rumannan, e tata Maikel Williams y e abogado mr. Rozenstand cu ta e abogado di e casa di Gerlien Croes.
YIUNAN A MENAZA ABOGADO
E rumannan a reacciona riba e expression di “zware jongens”. Nan a menasa e abogando bisando “bo ta bay haya den hende”. Na dado momento abogado mr. Rozenstand a lanta para y bisa Hues cu e ta protesta contra e forma con mr. Ruiz a tira acusacionnan riba su cliente.
E situacion a bira hopi tenso den sala di Corte. E rumannan W. a keda halza voz den sala contra mr. Ruiz cu tabata papiando. Na dado momento Hues a bisa e rumannan W. pa keda keto. Esaki tabata momento cu a scucha un sonido duro den sala di corte, Maikel Williams a lanta para y dal su man duro riba e mesa di abogado y expresa cu mester para mr. Ruiz.
MAIKEL WILLIAMS A MENAZA ABOGADO
Mesora e miembronan di CEA, hunto cu e agentenan di Policial cu e momento ey tabata presenta den sala di Corte, a gara Maikel Williams y hib’e pafor di edificio di Corte.
Mientras cu nan tabata sacando Maikel Williams, nan mester a pasa banda mr. Ruiz, aki Sr. Williams dilanti tur hende a expresa den voz halto na mr. Ruiz, “wak bo caya”.
Ta asina cu mr. Ruiz a sinti su mes amenaza pa e expresionnan di e yiunan y tambe Maikel Williams. El a pidi Hues pa haci anotacion di e menazanan den e relato di caso di Corte.
Despues e tratamento a sigui y Hues a sera tratamento di e caso y dia 21 April 2023 lo tin sentencia.