Oranjestad – Aruba
Ministerio Publico di Aruba a dicidi pa retira e apelacion contra e absolucion (vrijspraak) di e sospechoso A.J.R. den e asesinato di John A. ‘Poentje’ Castro riba 22 di december 2010.
Corte den Prome Instancia a duna R. vrijspraak riba 24 di mei 2022, casi 12 aña despues di morto di Castro, debi na falta di prueba. Ministerio Publico a bay den apelacion contra e decision aki di Huez, pero awor, despues di a bolbe studia e sentencia, Ministerio Publico a dicidi pa conforma. E motibo pa esaki ta cu e dossier actual no tin suficiente punto di referencia pa por yega na pruebanan legal y convinciente den e caso. E caso ‘Apollo’ lo keda un cold case y si na cualkier momento den tempo surgi mas prueba, lo wordo habri di nobo.
Ministerio Publico a reuni awe cu famia di difunto Castro y a pone nan na haltura di e decision.
E homber A.J.R. ta sirbiendo acualmente un castigo di prison den un otro caso.
Y di e manera aki e caso ta mustra di a muri atrobe. Speculacion tin hopi y nada mas.