Un persona cu ta biba cerca di Parke Nacional a conta nos na e sitio cu e la mira con un jeep di De Palm Tours bahando cu velocidad halto for di e cero pabou di e visitorscenter, pa un of otro motibo a sigui straight bay cay den e rooi dilanti e visitor center. Segun e persona e la core bati alarma.
Parke Nacional Arikok:
Diahuebs algo despues di 10’or y mey di mainta, durante un Safari Tour di De Palm Tours, e jeepnan tabata bahando di e cero bandi panort di e Visitor Center di Parke Arikok. Segun nos a compronde, un di e jeepnan aparentemente e brake lo a kibra of no a traha y e jeep a bay straight den e rooi dilanti di e Visitor Center di Parke Arikok. E Jeep cu tur 14 persona a bay cay den un mondi di hubada, cadushi y kwihi etc. Mesora e personal di Parke Arikok a cuminsa yuda e turistanan sali for di e jeep y a hibanan na e Visitor Center.
Varios unidad di Polis y tres ambulance a presenta hopi lihe na e sitio, pa asina atende cu e victimanan. No tabata tin niun persona cu a keda seriamente herida. Cinco turista a wordo transporta pa hospital y cinco a firma cu nan ta bon y no kier asistencia medico. Un Minibus di De Palm Tours a bin busca e otro 4 victimanan y hibanan hospital pa un checkeo medico. Entre 4 nan aki tabata tin e chauffeur y un mucha menor di edad.
Slachtofferhulp y tambe un of mas representantenan di De Palm Tours a presenta na e sitio pa brinda asistencia na e victimanan, kendenan ta turistanan di e cruiseship Carnival Cruises. Tur e victimanan mester ta prome cu 2’or y mey di merdia back riba e barco. E agent y slachtofferhulp lo trata pa nan regresa mas lihe cu ta posibel riba e crucero. Si acaso un of mas victima mester keda interna na Hospital, e representante di e agencia lo mester regla esaki y tambe e gastonan di e tratamento medico.
Tres ambulance a transporta e 5 heridonan pa hospital, por a mira tambe Departamento Tecnico di polis yega na e sitio pa asina cuminsa cu e investigacionnan necesario pa haya sa kiko tabata e motibo exactamente di e accidente aki den cual 13 turista a bira victima di dje. Na e sitio por a mira presencia tambe di Polis di trafico, cu a haci test di alcohol cu e chauffeur di e Jeep, pero a resulta cu e chauffeur no tabata bebi.
Segun varios persona den parke tabata comenta cu e jeepnan di varios tours ta core cu velocidad halto den parke, mientras e camindanan aki no ta pa core duro, mirando cu tin hopi baha, subida, bocht y rooinan chikito di piedra. Investigacion lo deduci si ta e brake mes a faya of ta algo otro.
