“Lo purba bin cu solucion riba e tereno aki, mirando cu e gastonan di personal ta pisa hopi riba presupuesto di pais Aruba.”
ORANJESTAD – Prome Minister Evelyn Wever-Croes a indica cu gastonan di personal di pais Aruba, ta un tema cu Gabinete Wever-Croes ta tuma hopi na serio. Por tuma nota cu desde 2017, cu a drenta gobierno, e gastonan di personal a cuminsa baha. Desde 1 di mei 2020, debi na e pandemia di covid, Gobierno di Aruba a tuma e decision pa corta 12.6% den salario di empleadonan publico y 25% den salario di e ministernan y parlamentarionan. Esaki tambe a contribui na un reduccion den e gastonan di personal. Pero, na juli 2022, ora cu gobierno a elimina 5% di e recorte aki, tabata tin un aumento chikito den e gastonan di personal. E subida aki por a nota un poco mas den 2023, ora a elimina e recorte completo.
Prome Minister a indica cu aunke tabata tin un subida na 2023 pa motibo cu a elimina e recortenan den salario, toch e gastonan di personal ta mas abou compara cu e añanan prome cu 2017. Na momento cu Gabinete Wever-Croes a drenta gobierno a cuminsa cu e Beleidsplan Verlaging Personeelslasten (BVP), cu a resulta den un reduccion den gastonan di personal di 9.6% (470 miyon pa 425 miyon). Cu e resultado aki, Aruba ta cumpli cu e palabracionnan haci cu Hulanda riba tema di gastonan di personal.
E cantidad di empleadonan publico desde 2017, tambe a baha cu 9%, di 4869 pa 4432. Aunke cu e gobierno actual a nombra personal nobo den funcionnan clave, e cantidad cu a retira/bay ta mas halto. E aumento den personal tabata na e departamentonan di Defensie, Arumil, Kustwacht, Inmigracion Aruba, DIMP y Ministerio Publico.
Na 2022, un total di 190 persona a bandona servicio di gobierno y un total di 93 persona a bin acerca cu ta resulta den un total di 97 empleado publico menos. Un di e motibonan den reduccion di personal ta un gran parti debi na VUT. Desde 2018, un total di 422 persona a bay cu VUT y na 2022 un total di 205. Otro motibonan ta e finalisacion di contract riba e empleado su propio peticion, fayecimento, yegada di edad di pensioen y retiro pa motibo disciplinario. “Pa loke ta trata overtolligheidspool”, Gobierno a traha duro riba esaki y a finalisa 2022 cu un total di 12 persona, di cual lo busca un solucion pa nan tambe.
“Esaki ta muestra cu Gabinete Wever-Croes I y II ta tuma e tema di gastonan halto di personal hopi na serio y ta purba bin cu solucion riba e tereno aki, mirando cu e gastonan di personal ta pisa hopi riba presupuesto di pais Aruba.” Prome Minister a expresa.
