253
Diabierna atardi riba un vuelo priva, e Presidente di Comite Olimpico Internacional, Thomas Bach a ateriza na Aruba. Na sr. Bach su yegada e la wordo ricibi pa Presidente di Comite Olimpico Arubano, Wanda Broeksema y Secretaria General di COA y Vice Presidente di IOC, Nicole Hoevertsz. Despues a sigui cu un bishita oficial di sr Thomas Bach y e Presidente di Panam Sports, Neven Ilic na Su Excelencia Gobernador di Aruba, Alfonso Boekhoudt. Por ultimo a hasi un bishita na Conseho di Minister unda sr. Thomas Bach y sr. Neven Ilic hunto cu e comite di ehecutivonan a wordo ricibi pa Prome Minister di Aruba, Evelyn Wever-Croes. Den Conseho di Minister a toka varios topico di deporte entre otro riba nivel escolar, practica deporte na edad hoben y importancia di igualdad den deporte y comunidad. Na final a hasi un intercambio di regalo entre Presidente di IOC, Thomas Bach y Prome Minister Evelyn Wever-Croes.
Mañan diasabra pa 9or di mainta lo tin e Festival Deportivo y e Apertura di e Oficina di Comite Olimpico Arubano den Vondellaan 27(bandi Banco di Caribe/otro banda di veld di Cricket). Lo bay tin demostracion di algun di nos deportenan Olimpico y e deportenan mas popular na Aruba. Tambe lo tey Archivo Nacional cu e historia di deporte na Aruba. Den e parti oficial lo corta sinta y lo canta e Himno Olimpico y e tono grlorioso Aruba Dushi Tera. Mas cu claro lo tin sorpresa cu no por divulga mucho. Excelencia Catering lo percura pa ofrece snacks y pasa boca tipico como tambe coy bebe na prijs di famia.
