DMH a habri 2023 cu yen di entusiasmo, energia y compromiso cu Codigo di Proteccion dentro di e instancianan na Aruba

Dia 16 di februari sra. Tea Hol, directora di LVAK (Landelijke Verening Aandachtfuncionarissen huiselijk geweld en Kindermishandeling) di Hulanda conhuntamente cu dos trainer di Departamento di Mucha y Hoben (DMH); Jullie-Ann Thode y Efraim Suurendonk y Stan van Haaren di Unicef, a ehecuta un dia di encuentro profesional na J.F.K. Education Center na e Supervisor di Codigo y Trainers di Codigo di Proteccion. Por a conta cu participacion di 35 profesional, cual ta 85% di e total di Supervisor di Codigo y Trainers. 

E meta di e dia aki tabata pa e.o.; presenta e inventarisacion di e 43 Supervisor di Codigo (SdC) dentro di e 14 instancianan na Aruba; e trayecto di profesionalisacion y centro di experticio cu Departamento di Mucha y Hoben (DMH) lo ehecuta den 2023 y 2024; e acuerdo di e Ministeriele Beschikking (MB) p’e profesionalnan, cu ta permiti nan ehecuta den un forma flexibel e rol di Supervisor di Codigo y Trainers; inventarisa unda cada SdC ta para actualmente y kico lo ta nan meta pa 2023; empodera y motiva e SdC y Trainers cu nan rol dentro di nan organisacion. 

Mester indica cu e dia aki a bay hopi bon, unda na final e profesionalnan a indica cu nan ta entusiasma, motiva, comprometi y tambe bastante ekipa cu conocemento di Codigo di Proteccion y con nan lo ehecuta nan rol. Nan participacion tabata uno hopi activo, unda nan a haci e preguntanan riba diferente aspecto y deseso, specialmente den e parti di trahamento hunto y bon colaboracion, pa bienestar general di nos muchanan. 

E diferente temanan durante e dia aki, tabata mas bien pa reforsa y empodera e rol di Supervisor di Codigo den su pleno ehecucion. Un di e temanan, manera reflexion propio, riba con bo ta mira bo mes den e rol aki den bo instancia, sigur a haya bon acogida y feedback. Creatividad y compromiso na final a keda totalmente demostra na final di dia, unda cu e profesionalnan sa y tin conocemento di e posibel retonan cu nan lo bay encontra y ta dispuesto  y ekipa con nan lo por atende cu nan, semper contando cu e sosten di DMH.

Definitivamente sra.Tea Hol di LVAK, a keda hopi impresiona, cu e actitud positivo y animo di e Supervisornan di Codigo y Trainers presente. E participacion tabata uno interactivo y a brinda oportunidad pa expresa pensamento y sentimento. Tambe a habri espacio pa activa e Supervisornan pa traha concreto riba sea e plan di implementacion y of protocol dentro di nan instancia y cu un periodo di tempo stipula.