ORANJESTAD – Awe mainta Hues di Corte den Promer Instancia a dicta sentencia den e caso penal contra un grupo cu a planea pa haci un asalto arma na Lucky Numbers den Playa.
ARUBA NATIVE por a compronde cu Hues a confirma e exigencia di Fiscal pa e hombernan C.G.H.(52) di Aruba, M.H.(38) di Aruba, J.I.(57) di Curacao, J.T.(27) di Curacao y G.M.(42) di Curacao biba na Aruba. Castigo entre 33 luna y 4 aña di prison a keda reparti pa e grupo.
SENTENCIA
Awe mainta e grupo C.G.H., M.H., J.I., J.T. y G.M. a presenta den Corte di Husticia pa scucha nan sentencia. Hues a bisa cu e no ta haya legalmente proba cu M.H. y G.M. tabata den posecion di arma di candela.
A PLANEA ASALTO RIBA OFICINA DI NUMBER
Hues a sigui bisa cu e ta haya legalmente proba cu henter e grupo ta envolvi den e planeamento di un asalto arma riba Lucky Numbers den Playa. Hues ta haya cu for di investigacion haci den Corte ta mustra cu C.G.H. ta e cabezante, kende a manda busca J.I. y J.T. di Curacao pa bin haci e asalto arma. El a bisa cu C.G.H. y G.M. a core den auto y studia e lugar di number. Nan a mira cu ta un homber di edad ta keda su so te anochi y e homber ta hiba e tas di placa den auto. Ora cu J.I. y J.T. a yega for di Curacao, C.G.H. a bay cu nan pa mustra unda e lugar ta y pa nan mira e homber di edad. C.G.H. a duna J.T. un arma di candela. E plan tabata cu J.T. lo ta esun cu ta bay ranca e tas cu placa for di e homber di edad, ora e sali for di e lugar. J.I. lo ta para ey banda cu un scooter pa asina nan move liher for di e lugar. Na veld di cricket na Vondelaan, M.H. ta warda nan den auto pa hiba nan. E scooter lo keda atras. C.G.H. y G.M. lo ta core rond pa vigila pa tur cos ta cla pa haci e asalto.
Hues a bisa cu e ta rechaza e ponencia di abogadonan cu voluntariamente e grupo a hala atras di haci e asalto. Hues a mustra cu e hecho cu J.T. a hala atras di haci e asalto, e resto di grupo no tin nada di haci cu esey pasobra J.T. tabata su so. Hues a mustra cu e motibo cu J.T. a hala atras, no tin nada di haci manera J.T. y J.I. ta bisa cu for di Curacao nan a planea di no haci e asalto. Na opinion di Hues, J.T. mes a declara cu tabatin mas hende den e oficina di number. Enberdad dia 27 Juli 2022, e homber di edad tabata cu un homber mas hoben. Hues ta haya cu esaki tabata e motibo cu J.T. a dicidi di hala atras pasobra e lo mester enfrenta dos homber.
NO TA TOLERA ASALTO
Hues a bisa cu no ta tolera asalto arma na oficina di number. Hecho asina ta pone cu hendenan den oficina di number ta bira nervioso pasobra nan por bira victima. Hues ta haya cu mester manda un señal bon cla cu Aruba no ta tolera esaki.
CASTIGO PISA
Hues ta haya e castigonan exigi pa Fiscal na su lugar. Hues a condena J.I. di Curacao na 33 luna di prison, pa J.T. di Curacao, G.M. y M.H. 40 luna di prison y pa C.G.H. cu ta e cabez tras di e plan 4 aña di prison.