Riba e prome dia di trabou na Corsou, Santos do Nascimento a participa den e Tripartiet cu delegacion parlamentario di Corsou y St. Maaten. E encuentro ta sirbi pa atende asuntonan propio, pero tambe como preparacion pa encuentronan di e Interparlamentaire Koninkrijksoverleg (IPKO) cu coleganan Hulandes di Eerste Kamer y Tweede Kamer.
E agenda di Tripartiet a core for di mainta caminda despues di e parti protocolario mara na e apertura y cu tabata habri pa publico, e delegadonan a duna inicio na un programa cu a transcuri henter dia. E prome punto tabata esun di reaccionnan riba e afspraaknan haci na e ultimo encuentro, sigui pa trafico aereo entre e islanan; specificamente su frecuencia y accesibilidad.
E parlamentario di AVP a cataloga e Tripartiet como uno den cual por a sostene reunionnan hopi fructifero. E diferente delegacion a yega na acuerdo y a formula un posicion comun pa trece dilanti den e proximo tres dianan cu ta atende IPKO.
Traimerdia a continua cu discusion riba e concepto di Geschillenregeling y por ultimo e preparacion pa topiconan di IPKO. Topiconan di mainta y atardi tabata porta cera. Tur encuentro a tuma luga den sala di reunion di sede di Parlamento di Corsou ubica den Wilhelminaplein na Punda.
“Como base di tur cos,nos ta kere cu cada pais den Caribe, cada pueblo, esta Aruba, Corsou y St. Maarten mester por dicidi riba nan propio destino,” asina Santos do Nascimento a comenta, indicando cu esey ta e esencia; e base di e geschillenregeling cu kier yega na dje manera ta ancra den articulo 12a di Statuut.
E parlamentario ta un di tres legislado representante di Partido di Pueblo Arubano (AVP) presente na e Tripartiet y Interparlamentaire Koninkrijksoverleg hunto cu colega drs. Mervin Wyatt-Ras y mr. Gerlien Croes, como parti di un delegacion mas amplio di Parlamento di Aruba.
FACEBOOK:
Hunto cu Corsou y St. Maarten a formula un posicion conhunto cu ta defende e interes di nos paisnan. Tambe a papia di con por mehora e trafico aereo pa haci biahamento entre e islanan mas facil y pagabel.
INSTAGRAM:
Base y esencia di geschillenregeling ta pa cada pais por dicidi su propio destino. Esey nos ta lucha p’e.