Recientemente e comision cu ta guia e investigacion encuanto e Bida Literario na Aruba a reuni pa trata diferente puntonan di interes. E investigacion aki ta cubri diferente areanan, manera e.o.: skolnan secundario, biblioteca, librería, autornan y e lesado. Pa cada area e investigado sr. Nicolaas a diseña un lista di pregunta, specificamente dirigi riba nan tereno, pa contesta. A base di e contestanan aki por haña un miho idea cua ta e motibonan cu tin e Bida literario tranca y kico lo mester haci pa mehora esaki.
E comision aki consistiendo di dr. J. Pereira, dr. W. Rutgers y dr. F. Guadeloupe a revisa tur e encuestanan y duna nan recomendación. E entusiasmo den comunidad pa participa na e encuesta aki ta hopi grandi. Esaki ta keda ilustra pa e cantidad di personanan cu ta registra nan email via [email protected] pa ricibi e encuesta. Proximamente lo aparece riba diferente website, manera e.o. di Fd. Lanta Papiamento (FLP) y di Career IQ, unda bo por djis primi riba e boton, anto e encuesta ta habri pa asina por yena esaki y na final manda bo contestanan aden.
Den pasado hopi a ser papia y insinua tocante e bida literario na Aruba, pero no ta tin datos pa substancia e ponencianan aki. Tin hopi factornan cu ta hunga un papel den esaki y cu mester tene cuenta cu ne. Pues hopi ta esnan cu tabata pensa algo y bisa esaki, mientras nunca por a comproba esaki. Pero awor cu e investigacion aki, si ta bira posibel pa pone e dede riba e herida y busca un remedi p’e. E investigacion aki – segun sr. Nicolaas – ta e prome den su sorto y ta algo cu lo mester ripiti cada decada of cada cinco aña. Asina’ki lo por sigui monitorea e tereno aki y por construi un pais sano y fuerte.