Despues di e restauracion di e exterior di e monumento na Steenweg, conoci como ‘Botica Aruba’, cual a termina na 2021, Stichting Monumentenfonds Aruba (SMFA) a continua cu e proceso pa yega na un huurdo. Aña pasa a logra yega na un acuerdo cu KOAL Restaurant y asina a cuminsa december cu e renobacion di e interior di e piso abou di e edificio.
Despues di un destaho a otorga e proyecto na e compania di construccion Sumipet. Awor ta asina leu cu a finalisa cu e trabounan na e piso abou. E renobacion a tuma lugar bou di guia di nos lider di proyecto y hunto cu e huurdonan p’asina por haci e adaptacionnan necesario pa comberti e piso abou y e patio den un restaurant. E monumento na Steenweg tambe ta conta cu un sistema di reciclahe di awa, caminda cu lo colecta e awa di e airconan y ta uza esaki pa irigacion di e matanan den e patio. Cu esaki ta bira e di dos edificio di SMFA cu ta conta cu un sistema pa recicla awa.
Pa locual ta trata e promer piso, awor lo continua cu e renobacion hunto cu e team di Cocolishi Studios den e proximo lunanan.
Awe, 23 di februari directora di SMFA, Anne Witsenburg, den presencia di Minister di Cultura, Xiomara Maduro, Minister di Economia, Geoffrey Wever, y invitadonan, a presenta e resultado final. E lider di proyecto, Daphne Fernandes Pedra a duna un splicacion amplio di e diseño di e interior y cual ta e elementonan original cual por mira ainda na tanto parti paden como na e patio.
SMFA kier desea KOAL hopi exito y gradicinan pa a scoge un monumento y asina contribui na preserva nos pasado pa futuro! Pa mas informacion: www.koalrestaurant.com
Steenweg 19 ‘Botica Aruba’
E edificio na Steenweg, ta un monumento proteha cu a keda construi na 1925 pa Addison Winfield Croes. Hunto cu Gustave Nouel a cuminsa un di e prome boticanan riba e isla bou di e nomber di Botica Aruba na aña trinticinco.
Durante e restauracion a hiba e edificio bek na su forma original
den cual el a keda construi den añanan binti. Un monumento cu hopi detaye y decoracion cu a keda descubri durante e proyecto. Nos a logra restaura tur esakinan, habri e balcon di e edificio bek y trece bek e decoracionnan den estilo ‘gingerbread’ tanto na e bentananan como na e balcon.
Den e forma aki Stichting Monumentenfonds Aruba por garantisa cu e monumento di Steenweg lo tey pa futuro generacionnan por conoce tambe e historia di Botica Aruba.
