45 aña centro di bario playa pabao

Dia 23 di februari 1978 dilanti notario MR, E.L.Lacle “Stichting Centro di Bario Playa a wordo funda cu meta pa fomenta desaroyo spiritual, social y fisico di e bario di Playa Pabao.
Mi mes no a forma di e 13 baluartenan cu funda nos funndacion y danki na nan nos ta awe na unda nos ta.
Ami semper tabata gusta actividadnan den bario. Como mucha nos tabata bay actividadnan na Centro di Bario Noord, Sportboys y na e scol banda di mesa di Paradera. Semper mi tabata bisa cu nos bario mester di su Centro y lo mi yuda ora cu ta asina lew. Te un dia mi a lesa den corant cu “Stichting Centro di Bario Playa Pabao” a bira realidad y cu su presidente sr Luis Vingal(dmf) cu tabata mi hefe na ofisina di impuesto. Pues pan den cas. Su siguiente dia mi a acercele den su ofisina y mi a bise cu mi ta dispuesto pa yuda. Su contesta tabata: bon bini pasobra mientras tanto tabatin algun puesto habri den directiva. Den e proximo reunion mi a wordo introduci y elegi como miembro di directiva hunto su sra Gisela Schotborg (dmf) y sr Antolino Chirino (dmf) ambos mi a traha bon cu nan y naturalmente compaña cu algun discucion fuerte. Durante e reunion mi persona y Tolin a para fuerte pa esnan cu a subi lista di un partido politico no mag di forma parti di nos directiva. Naturalmente no unanime pero e mayoria a acepta nos proposicion. Preparacionan a sigi tuma luga. Cada miembro a haña un comicion na nan encargo. Mi ta corda mi persona a haña comicion di hubentud (CHUPP), Gisela (dmf) di damas, Tolin (dmt), Nolly Becker deporte. Como miembro na cabes di comision di hubentud a bay relativamente fasil. Pa forma parti di ecomision mi tabatin pa Madiki: Debby, Judella, Dorilla y Earl. Cas di Pueblo: Pascualita, Maggy y Yvonne. Pa Rancho: Camala, Poppy y Judith pa Pos Abou: Rosa y Santa Helenastraat pariba: John. Pues un grupo di 12 hoben cu hopi gana pa traha pa nan bario. Mi tarea tabata pa siñanan organisa actividad, dirigi reunion y notula. Mi tin di bisa mi a haña ayuda di stagiere Lupita. Actividadnan cu nos a organisa tabata anochinan di cine, hersensgymnastiek pa hubentud, vakantiekamp cu wak luz di dia dor Roy van Putten (dmf). Ora mi bisa cu ela bay fasil pasobra e hobenan tabata hasi tur cos. Tene reunion pa planifica e actividad.trha relato do prensa,notula, acerca personanan cu mester pa e actividad. Bonita recuerdo, Anochi di cine mester di popcorn (temporada di hotdog na yega ainda). Anochi di cine a tuma luga den gyumzaal di Sint Franciscus College y como famia Lewis ta biba cerca di scol a dicidi di hasa popcorn na cas di famia Lewis. Naturalmente cu permiso di mayornan. Despues di e anochi di cine e mannan di rumannan Lewis no tabata cos di wak. Ful kima cu e azeta ora ta prepara e popcorn. Nos a bisanan “esey ta amor pa bo bario.”
Comision di damas tambe tabata un tremento comision.Ora di actividad no mester a paga niun hende pa cushinan. Nan mes tabata cushina solamente directive tabata paganan pa gas y tabata cumpra loke cu tabatin mester pa cushina.
Pues Centro di bario Playa Pabao a wordo recibi cu mannan habri pa e bario.
Den comienso tabatin un tiki problema cu e nomber. Ta wordo bisa cu Playa Pabao no ta existi yamele Centro di Bario Rancho. No sabiendo cu esey no tabata e intencion di e fundadornan. Nan a lanta un centro pa tur e barionan di Playa Pabao. Manera Socotoro, Socotorowijk, Rancho. Madiki, Bushiri, Santa Helena y Pos Abou un parti. Na DOW e barionan aki ta conoci bou di Oranjestad West traduci na Papiamento Playa Pabao.