Algemene Rekenkamer di Hulanda (ARNed) a realisa un bishita di trabou na e islanan Caribense den Reino durante e siman di 13 pa 17 di februari 2023. E bishita a enfoca riba dos tema general. E prome tema tabata pa cera conoci cu e region, pa di es manera aki obtene un bista general di e situacion di e islanan. E segundo tema tabata mas specifico y a concentra riba e funcionamento di Algemene Rekenkamer y e area den cual nan ta funciona.
Como parti di e bishita di trabou, Algemene Rekenkamer di Hulanda a bishita Aruba dia 14 di februari ultimo. E delegacion a consisti di e presidente interino, sr. Ewout Irrgang, director di Asuntonan Interno y Relacionnan di Reino, sr. Burhan Gün y director di Relacionnan Internacional, sra. Ina Hopman.
Pa Algemene Rekenkamer Aruba e bishita a ofrece e oportunidad pa conoce e presidente interino y su delegacion personalmente como tambe e oportunidad pa delibera riba un cooperacion bilateral entre e dos Rekenkamernan. Algemene Rekenkamer ta busca posibel colaboracion cerca ARNed abase di resultadonan di un auto-evaluacion y e acuerdonan cu ta inclui den e Landspakket di Aruba, pa loke ta trata fortalece e posicion di Algemene Rekenkamer y e maneho financiero di Pais Aruba. Den e contexto aki a tuma lugar un mision na juni 2022 di cual den e proximo periodo lo presenta un plan di accion. Considerando esaki a realisa algun bishitanan oficial cu stakeholders, manera Gobernador di Aruba, presidente y lidernan di fraccion den Parlamento, Prome Minister y Raad van Advies.