ORANJESTAD: Diaranson mainta, Minister di Deporte Endy Croes a reuni cu Arubaanse Wegenbouw Maatschappij (AWM) y Dienst Openbare Werken (DOW). Reunion tabata basa riba e pista di Palo Marga International Raceway Park Aruba. Manera nos sa, e proyecto di luz ta den pleno ehecucion, pues e aña aki Palo Marga lo haya su luznan nobo. Banda di esaki, Minister Endy Croes hunto cu AWM y DOW ta planificando pa evalua e posibilidadnan di pone un pista nobo e aña aki of prome kwartaal di aña 2024 pa Palo Marga.
Sr. Kurt Johnson di Total Venue Concepts, un profesional den e preparacion di pista di “drag racing” na Merca, a bishita Aruba na september di aña 2022, pa evalua kico tur mester haci pa e pista di Palo Marga wordo certifica. Sr. Johnson den su carera a atende cu hopi pista di drag race rond mundo y tin conocemento y experticio amplio pa evalua, midi, bora, analisa pista y duna un rapport final.
Aña pasa, Sr. Johnson a traha un rapport di e pista di Palo Marga y a presenta cinco (5) opcion den su rapport. Durante e reunion Minister Endy Croes hunto cu AWM y DOW a discuti riba e topico aki pa mira cua di e opcionnan aki ta factibel y evalua si tin fondo pa renoba e pista di Palo Marga. Pues, Minister di Deporte hunto cu AWM y DOW ta den preparacion y planificacion di e proyecto, prome cu yega na posibel fase di ehecucion.