E cooperacion entre Horacio Oduber Hospital (HOH) y Universitair Medisch Centrum Utrecht (UMC-Utrecht) a haya un dimension extra door di e donacion di un aparato medico di calidad halto pa neurocirugia yama ‘Stealth’. E aparato aki ta asisti e ciruhano ‘real life’ pa nabega pa un tumor – den por ehempel e celebro- pa medio di grabacionnan diagnostico di e pashent. Siman pasa neurociruhano di HOH, dr. Greg Laclé hunto cu neurociruhano dr. Pierre Robe di UMC-Utrecht pa prome biaha na Aruba a kita un tumor di celebro exitosamente haciendo uzo di e neuro-nabegacion aki. Durante e operacion aki tambe a uza e Sonopet, un otro aparato recien adkiri pa HOH. Durante corto tempo e cooperacion entre HOH y UMC-Utrecht a duna su fruto caba. Tin 18 pashent cu no mester a wordo manda afo y por a wordo opera na Aruba mes.
Neurociruhano dr. Greg Laclé ta conta di e ‘Stealth’a. “Por mira e aparato aki manera un GPS pero den e caso aki pa nabega den e celebro di e pashent. E sistema di guia aki por wordo uza pa operacionnan di celebro, e columna vertebral y tambe pa orea/nanishi of garganta. E sistema ta registra imagennan preoperativo di pashent manera un MRI of CT scan cu imagennan ‘real-time’ capta durante e operacion door di un camera LED. E ciruhano por scohe un proyeccion di e area cirurgico di un set di imagen 3D, por combina e data di imagen di diferente fuente y por controla e localidad di camera pa un miho bista di e area cirurgico”, segun dr. Laclé.
E sistema di nabegacion ta traha cu e software Linux cu ta facilita e analisis di e scan diagnostico preoperativo y ta permiti pa un ruta mas safe y menos invasivo pa e area den e curpa di pashent. Den neurocirugia e sistema ta duna aceso na detayenan anatomico individual di e pashent su celebro y asina por yega na e localidad preciso di e lesion of tumor obtene for di e data diagnostico. Depues a uza e otro aparato nobo di HOH, e Sonopet, cu ta kita e tumor na un manera hopi preciso y optimal pe pashent por recupera mas rapido y miho.
Director medico di AZV, drs. Joost Samuels ta indica di ta contento cu e operacionnan aki por wordo haci awo na HOH mes. “ E ta un beneficio enorme pe pashent pa wordo trata y tambe pa recupera na su mesun pais. Ora bo ta malo bo no kier nada otro cu ta hunto cu bo sernan keri y na e luga cu bo ta stima. Ademas, e ta gastonan menos pa nos di seguro di cuido medico. Loke a spaar por wordo uza pa cuido di otro pashentnan”, Segun Samuels.
Director di HOH, drs. Jacco Vroegop, ta conta cu su prome experiencia di operacionnan di neurocirugia tabata na Erasmus MC. ”Un pasion y admiracion pa e specialisacion aki semper a keda. E ‘Stealth’, mescos e Sonopet, ta indispensabel pa varios operacionnan grandi di neurocirugia. Bo mester di tur dos pa ehecuta e spectrum completo di neurocirugia cu precision. Danki na e cooperacion entre HOH cu UMC -Utrecht y sigur tambe AZV, a logra trece e aparato aki na nos isla. Mi ta contento cu cada bes nos ta logra pa amplia mas e cuido medico na Aruba y e servicio na nos pashentnan. Den e caso di ‘Stealth’, tambe a trece un pida di mi pasado na Aruba. Mi ta orguyoso di nos empleadonan y nos hospital y cu nos di HOH nos ta tumando pasonan grandi padilanti”, segun Vroegop.
Neurociruhano di UMC- Utrecht, Pierre Robe ta conta cu e ta impresiona cu e team di empleadonan na HOH. “No solamente e team di OK pero tambe departamento di enfermeria unda e team a demonstra di ta uno hopi motiva y tambe flexibel adaptando lihe na situacionnan nobo. Nan ta siña y compronde lihe y siman pasa por a asisti e operacion special aki tambe sin niun problema. Mi ta mira bek riba un operacion cu a cana hopi bon y tambe e tratamento riba departamento B3. E pashent ta sinti su mes bon tambe. Mi ta sinti mi mes bon bini, coleganan ta cordial y e cooperacion cu dr. Laclé tambe ta agradabel”, segun Robe. E ta bisa di ta orguyoso di e cooperacion entre UMC-Utrecht y HOH y ta spera riba mas oportunidadnan hunto.
