Den Haag – Un delegacion di gemeente Venray a haci un bishita oficial na Minister Plenipotenciario mr. Ady Thijsen. E delegacion encabesa pa e burgemeester di Venray Leontien Kompier a conta tambe cu wethouder (diputado) Daan Janssen y miembro di e Gemeenteraad pa e partido Venray Lokaal Amira Luydens-Dabian.
E bishita di e delegacion di Venray ta un bishita pa coresponde esun cu Minister Thijsen a haci na Venray pa papia riba puntonan di cooperacion entre Aruba y Venray. A papia riba orientacion riba projectonan di agricultura riba un escala chikito, pero na mesun momento produci productonan di calidad halto. Venray ta conoci pa produccion di honing y akinan por mira unda Aruba por tin bentaha di e experticio di Venray pa su mesun produccion di honing. Tambe a papia di plantacion di matanan di fruta pa por bin cu produccion di jam pa e mercado local y e hotelnan. Segun minister Thijsen esaki tin potencia na Aruba mirando cu awor tur loke ta jam pa desayuno ta wordo importa. Otro aspecto cu tambe ta bon pa sondea ta cria di cabrito y produccion di keshi di cabrito, cu na Europa ta wordo considera como un delicatesse.
Durante e combersacion a papia tambe di cooperacion riba e tereno di gobernacion cu sosten di VNG (Vereniging van Nederlandse Gemeente). Burgemeester Kompier lo tuma contacto riba esaki cu VNG y Pro Demos pa mira cual rol VNG por hunga pa bin cu un Conferencia di Mesa Rondo pa papia riba futuro relacion den Reino Hulandes.
Riba e aspecto di cuido a papia riba manera pa hisa e nivel di educacion di e estudionan tanto pa LBO como MBO. Lo mester busca moda pa ahusta e curriculum na EPI pa asina e por ta riba e mesun nivel cu un MBO na Hulanda. Tambe a papia riba e posibilidad pa intercambio di studiantenan di Gilde College cu ta un scol MBO na Venray. E initiativa riba e tereno aki ta den man di Amira Luydens-Dabian.
Por ultimo den cuadro di 70 aña di Carnaval di Aruba na 2024 a papia riba un exposicion di Carnaval conhuntamente cu Gemeente Venray, mirando cu e cuidadnan den e provincianan Brabant y Limburg ta celebra Carnaval. Wethouder Janssen lo tuma contacto cu e organisacion di Carnaval di Venray De Piëlhaas y e Venrays Museum. E initiativa pa cu e exposicion aki ta den man di Arubahuis.