ORANJESTAD – Durante un evento ameno na Fort Zoutman, Aruba Investment Agency (ARINA) recientemente a lansa su website nobo, investinaruba.com, hunto cu Minister di Asunto Economico, Comunicacion y Desaroyo Sostenibel, Sr. Geoffrey Wever. E website ta inclui informacion actualisa tocante oportunidadnan di inversion riba nos isla. Tanto inversionistanan local como stranhero por bishita e website pa obtene informacion di oportunidadnan comercial den e sectornan prometedor di Aruba.
E caracteristicanan di e website
E website no solamente tin un diseño moderno y elegante, sino tambe tin informacion detaya tocante e investment climate (clima di inversion) di Aruba.
“Nunca mas bo no por keda sin haya informacion actualiza tocante oportunidadnan di inversion na Aruba”, Sr. Geoffrey Wever, Minister di Asunto Economico, Comunicacion y Desaroyo Sostenibel a menciona.
ARINA ta invita bo pa bishita y explora e website nobo. Descubri e razonnan principal pa scoge Aruba como destinacion pa inversion banda di e sector turistico. Ricibi e ultimo noticianan tocante temanan relaciona cu haci negoshi y e proximo eventonan. Conoce tur e ‘ins and outs’ tocante con pa haci negoshi na Aruba, e sectornan prometedor y e differente oportunidadnan comercial cu esaki ta ofrece e inversionistanan local y stranhero.
Tocante ARINA
Aruba Investment Agency (ARINA), un unidad di Departamento di Asunto Economico, Comercio y Industria (DEACI), ta e agencia di inversion di gobierno cu ta promove y facilita inversion na Aruba. ARINA tin como obhetivo pa atrae inversionnan nobo den e sectornan prometedor di Aruba. Su obhetivo principal ta pa haciele mas facil posibel pa inversionistanan establece nan companianan na Aruba. ARINA ta traha di acerca cu partnernan strategico pa facilita e proceso pa e inversionistanan, dunando nan informacion, asistencia y conseho. E agencia ta yuda y conseha inversionistanan den establecemento, lansamento y expansion di nan actitividadnan comercial na Aruba.