Husticia a drenta na 4 adres pa huiszoeking, unicamente pa confisca material y documento,
niun persona a wordo deteni
Oranjestad/San Nicolaas;
Diamars den careda di 6’or di mainta a tuma luga 4 huiszoeking, na diferente adres. Un team consisti di Ministerio Publico, Landsrecherche, RST y Polis a drenta na 4 cas, no a detene ningun persona. Pero si a confisca materialnan y documentonan cu posibelmente lo por ta di importancia pa e investigacion di Caso Kwihi. Caso Kwihi ta wordo conduci pa Landsrecherche.
Den oranan trempan di mainta a bishita un cas na Butucu, na Dahliastraat, na Savaneta y den area di Noord. Na cada adres lo a confisca material cu lo por ta di importancia pa cu e investigacion andando. E investigacion ta relaciona cu ex Minister y ex politico Romero, durante cu e tabata den funcion di Minister, su cas tambe a wordo bishita.
E motibo di e investigacion ainda no ta conoci, despues cu Landsrecherche caba di investiga tur locual a wordo confisca, lo por tin mas claridad di Caso Kwihi. Actualmente e motibo di e caso no ta conoci, despues cu Landsrecherche caba lo por bisa si lo tin un of mas sospechoso y si lo persigui e sospechoso penalmente.
Husticia constantemente ta haci entradanan hudicial, pero solamente si tin suficiente prueba lo por papia di un sospechoso y si ta asina si husticia lo por persigui e sospechoso.
Informacion oficial di Ministerio Publico:
Awe a tuma lugar huiszoekingnan bao guia di huez-comisario relaciona cu un investigacion di algun contrato di servicio cera dor di C.V.J. Romero den su funcion di minister e tempo ey. E zoekingnan a tuma lugar na cuatro adres. Ta trata un investigacion di Landsrecherche.
Na e cuatro adresnan a tuma entre otro, portadornan di informacion y administracion den beslag.
