Diahuebs 2 di februari ultimo Organo Ehecutivo AZV (OE AZV) a tene su prome sesion informativo pa 2023 pa su dunadonan di cuido. Topico di e sesion aki tabata un splicacion y ripiticion tocante e cambionan den e lista di remedi cu a tuma luga aña pasa 1 di oktober.
Meta di e sesion
Meta di e sesion aki tabata pa brinda e oportunidad un biaha mas na e dunadonan di cuido (specificamente e dokternan di cas y specialista) pa haya informacion tocante e cambionan cu a tuma luga y con pa aplica esaki den practica.
Presentacion
E presentacion mes a wordo duna door di señora Belinda de Veer, un di e accountmanagersnan di e departamento di Contrato di Cuido. Su persona a splica cu e cambio den e Ley AZV (seccion remedi) ta e motibo pakico OE AZV mester a tuma paso. E ehecutacion mes ta un tarea cu ta tuma luga hunto cu e dunadonan di cuido, cuminsando na e dokternan di cas y specialistanan, kende ta esnan cu ta prescribi remedi. Desde 1 di oktober 2022 tur dunado di cuido mester a mantene nan mes na e reglanan nobo di e lista di remedi cu e meta pa por reforma y garantisa AZV pa futuro generacion.
E cambio pa e asegurado
Di otro banda, e aseguradonan tambe a conoce un cambio. Unda antes tabata haya practicamente tur cos paga door di AZV, awor e asegurado mester corda cu e mes ta responsabel pa e remedinan “OTC”, esta e remedinan cu ta haya sin receta di dokter, cu ta accesibel riba reki den botica y cu ta generalmente pa alivia sintoma y pa recupera den tempo hopi cortico.
Liña di informacion
E liñanan di informacion pa remedi (5925311 / 5925355 / 5925399) cu OE AZV a habri desde oktober 2022 pa awor ta mustra un desaroyo positivo. Unda na comienzo di e cambio tabata tin un ‘piek’ di yamada, ya awor e cifranan ta mustra cu e yamadanan a baha y ta mustra cu e aseguradonan ta na altura y ta compronde e cambio.
Evaluacion
Ta palabra cu e dunadonan di cuido cu na fin di maart pa comienzo di april e evaluacion oficial ta tuma luga.