Como parti di A.T.A. su strategia, tin varios momento durante aña unda ta reuni cu socionan di Aruba, como tambe ekipo di A.T.A. den e mercadonan.
Recientemente a tuma luga e ‘Latin American Marketing Update Meeting’, unda cu a presenta mas detaye di e plan y objetivo pa 2023 na socionan local.
E reunion a tuma lugar na Hyatt Place Aruba Airport, caminda cu a duna un presentacion extenso di kiko lo por spera pa 2023 den e plan di mercadeo pa Aruba. Esnan presente por a presencia algun idea nobo y otronan ‘out of the box’ pa mercadea e isla di Aruba den exterior y asina atrae aun mas bishitante pa nos isla.
E mercado di Latino America a tarda un poco mas pa habri bek despues di pandemia den comparacion cu Norte America y Europa, pero mester bisa cu e recuperacion ta andando pa e mercado aki tambe. Te cu November por wak un recuperacion di 76% den cantidad di bishitante for di Latino America compara cu na 2019, pues ta premira cu e recuperacion aki lo sigui ya cu e mercado ta indica cu e demanda tey. E recuperacion principal na e momento aki ta for di Colombia unda cifranan ta indica cu ta practicamente yegando na e nivel di 2019 bek.
A probecha di tin tur socio hunto pa gradici tur cu a duna nan coperacion pa e recuperacion y a duna un certificado special na algun di e socionan cu mas a produci pa e mercado pero tambe cu a participa den diferente iniciativa di e mercado y tawata presente y interesa pa sigui crece e mercado aki. Pa loke ta tarta hotelnan a reconoce Brickell Bay Beach Club & Spa, Barcelo Aruba, Eagle Aruba Resort & Casino, RIU y Holiday Inn Aruba. Tambe a reconoce De Palm Tours den e area di actividad.
Danki na tur socio cu ta apoya e mercado di Latino America, esaki sigur ta haci e estrategia di diversificacion posibel. Pa 2023 A.T.A. lo sigui enfoca riba diversificacion di bishitante pa asina tin un distribucion sano di bishitante di diferente region.
